Higher Sec. School 5-i Youth Parliament nung shilem agi

Dimapur, October 13 (TYO): October 13, 2017 nü Council Hall, Mon nung District level Quiz & Youth Parliament Competition agiogo aser iba tetoktepba sentong nung Higher Secondary School pongui shilem agia liasü.
Iba sentong nung jembidang GHSS, Mon D & Nodal Officer, Youth Resources, Nagaland, Limawati-i, tangazükba alitsü atema item ama sabang nung shilem agitsüla, ta kaketshirtem ayongzük.
Paisa, item ama sentong ayongzüka akaba ajanga tarutsü atema parnoki aika angazüktsü, ta ashi.
Youth Parliament aser Quiz Competition naprongla nung takok angurtemi district tenüng nung State level competition nung shilem agia tokteptsü, ta pai metetdaktsü.
Youth Parliament moderator, PGT, GHSS, Mon, Vesezolu Konyak-i, Youth Parliament ya kaketshirtem atema nüngdak, kechiyong iba ya ajanga kaketshirtemi democracy inyakyim angateta tajungtiba nung shilem agitsü, ta ashi.
Laisa, item ama tetoktepba ajanga kaketshirtemi linük nung Parliament inyakyim junga angatettsü, ta metetdaktsü.
Youth Parliament tetoktepba nung St. John Hr. Secondary School, Mon nungi P.Nyamai-i mezüngbuba jenjang nung takok angu; tanabuba aser tasembuba jenjangji GHSS, Mon nungi Jewang aser Don Bosco Hr. Secondary School nungi Denishi nati angu.
Ano Quiz tetoktepba nung GHSS, Mon-i mezüngbuba jenjang aser tanabuba jenjang aser tasembuba jenjangji GHSS, Mon D aser Don Bosco Hr. Secondary School nati angu.
Quiz Master ji PGT, GHSS, Mon, S. Imti Tenjen Ao liasü.