Higher & Technical Minister, Temjen Imna Along-i Zunheboto semdang

Zunheboto, Luroi/August 01 (TYO): Chiteni/July 31, 2018 nü Higher & Technical Education Minister, Temjen Imna Along-i Zunheboto semdanga liasü.
Zunheboto Government College semdangba mapang nung pai, iba college nung Science stream tenzüktsü atema sorkari agizükogo, aser ibaji School Education Advisor, KT Sukhalu-i achaayanga inyakba ajanga lir, ta metetdaktsü.
Tesülen Minister aser pa meinertemi Khelhoshe Polytechnic Atoizu semdang; KPA nung jembidang minister-i, iba reju tenzüker küm 46 tashi jungaka iba reju nung diploma degree dang agutsüba ajanga süngmanger, ta ashiba den külemi iba reju Engineering College jenjangi ajungkettsütsü atema pai akokba tashi meranga inyaktsü, aser pai semdangba tetezümong ketdaktsütsü, ta shisem.
Pelaa agizükba o jembidang Khelhoshe Polytechnic Atoizu Principal, Er. M Nakhro-i iba reju nung metokmeperitem metetdakja minister dang iba reju ya full-fledged Civil Engineering degree College ka kümdaktsütsü mepishia liasü.
Kasa sentong nung School Education Advisor, KT Sukhalu-ia jembi; pai Atoizu nung aliba sensotem dang shisakaa alitsü aser iba maongka agiteta iba reju jenjang tajungba akumtsü ayongzüka liasü.
Kasa sentong nung MLA Atoizu Picto, Sumi Hoho, SKK, Chairman Land donors ajaki iba reju tajungba akumtsü atema akokba tashi sorkar nungita yaritsü ta shiogo.
Tesülen minister-i iba reju nung kaketshirtem aser tesayurtem ajurua jembia liasü.