Highway ajak nung ongken makai yangluang: NHAI

New Delhi, December 07 (Agencies): National Highways Authority of India (NHAI)-i regional office ketdangser ajak dang highway nung ongken kata makai yanglutsüla ta tuyuba osang ka jangjaogo.

NHAI-isa headquarters nungi ‘approval’ matai highway nung ongken aliba yanglutsü atema sen crore 1 tashi agüjang ta regional ketdangsertem nem tashi agütsüogo.

“NH lenmangtem nung ongken adokliyongi yanglutsü atema onoki iba telemtetba agiogo. Engineer tem aser ketdangsertemi ochishia inyaktsü onoki imlar. Parnoki iba mapa ya nendaka meinyakra onoki reprangshiba sülen nüngdakba mera agitsü,” ta NHAI Chairman, Raghav Chandra-i osangbenertem dang ashi.

Paisa, iba tetuyubaji taoba hopta agütsüogo, ta ashi.

Highway nung senzürtemi lenmang nung ongken aliba aser lenmang kanga majungba osang aser shidi züluba aika pa indang office tonga aruogo.

“Ni regional ketdangsertem aser project director tem asüngdangba mapang parnoki, maparen atema NHAI dangi yokogo aser approval atar. Inyakyim tim atadang mapa menoba atemabo oda inyakatoktsüla, koba ajanga lenmang nung senzürtemi timtem majangshitsü. Lenmangtem ya nüburtem amshitsü atema yanglu. Highway tajungba akumtsü atema NHAI-i maparen aika inyakdar,” ta Chandra-i ashi.

Hombar nü TOI-i osang ka ajanga metetdaktsüba agi, UK ama linüktem nungbo küm pongu tsüngda highway ajak nung ongken yanglmatsü atema mapatong tulu tenzükogo, iba den külemi ongken shia nung sen intoktsü atema-a latetogo.

Road transport minister, Nitin Gadkari-ia, nija developer temi yangluba lenmangtem ji project nung densemtsü atema Centre-i budget nungi sen intoktsü melunga dang lir, ta tamalen shiogo.