HIL Auction sentong September nung agitsü

New Delhi, August 21 (Agencies): 4 buba Hockey India League (HIL) asayamong asoshi terenemshiba agia, hockey asayartem auction asüba sentong taruba September ita 17 nü Delhi yimti nung agitsü asoshi ayongogo.
HIL asayamong nung shilem agiba telok 6-i iba asayar nübo alizüktsü sentong nung shilem agia India, Australia, New Zealand, Canada, USA, England, South Africa, Netherlands, Germany, Belgium, Scotland, Malaysia, Japan aser Korea nunger asayartem nübo alizüka pei telok jenjang tajungba akümtsü asoshi terenemshiba tulu agia lir.
HIL nung shilem agiba telok shiai India asayar 3 aser pei teloki aginüba bendang asayartem maneni pei telok nung züngsemdaktsüba sülen tanüngba asayartem yokadoktsü tetuyuba ka HIL ketdangsertemi tan August ita tetenzüklen agüja lir.
Aji oda, HIL nung shilem agiba teloktemi taruba September ita agitsü ayongba auction sentong nung India nunger 135 aser bendanger 142 densema ajak agi hockey asayar 277 indang nübo alizüktsü renemtsür lir.
Telok shiai India asayar 12 aser bendang asayar 8 densema ajak agi asayar 20 tashi pei telok nung züngsemdaktsütsü ozüng tasen ka HIL ketdangsertemi latetogo.
HIL Auction 2015 sentongji nungtugu auction sütsür, Britain nunger Bob Hayton-i ketdangsüa agitsü asoshi renema lir.