HIL: Dabang Mumbai teloki goal 8-3 agi Waveriders akok

New Delhi, February 09 (Agencies): Dabang Mumbai teloki field goal 4 tashi agütsüba ajanga par teloki goal 8-3 agi Delhi Wawriders madak takok ngua tang tasayadak Coal India Hockey India League (HIL) asayamong nung tanü, Mongolbar nü shilem agiogo.
Steven Edward-i asaya tenzüker minute 22 buba nung field goal 1 agütsüba den külemi, Rupinder Pal Singh-i minute 39 buba nung goal 1 agütsüba ajanga par Waveriders teloki goal 3-0 agi temaba jenjang ngua asaya.
Ajisüaka, Danish Mujtaba aser Nilakanta Sharma nati minute 49 aser 52 buba na nung field goal kaka agütsüba ajanga Mumbai teloki goal 4-3 ngua temaba jenjang angu.
Tesülen, Manpreet-i maneni field goal 2 tashi agüja kanga junga asayaba yong par Mumbai teloki goal 8-3 agi Waweriders telok madak ajemshia takok angu.
Tanü takok anguba sülen Australia nunger hockey asayar mongin, Jay Stacy-i coach asüba Mumbai teloki asaya 7 nung ajak agi points 19 ajangzüka tan asayamong nung shilem agir telok tarensen nung 4 buba jenjang tonga tuogo.
Ano külen, tan agi asaya 4 buba atonga tamakok anguba Waweriders teloki asaya 8 nung ajak agi points 17 ngua 6 buba jenjang nung lir.
Mumbai teloki par taruba asaya Jaypee Punjab Warriors telok den asayatsü aser Waweriders telokia Ranchi Rays den ajuruteptsü.