HIL nung UPW-i Punjab 6-2 agi akok

Chandigarh, February 13 (Agencies) : Tang tasayadak Hockey India League (HIL) asayamung nung Hombar nikongtsütsü Uttar Pradesh Wizards (UPW)-i 6-2 agi Punjab Warriors madak takok angu.
Asaya tenzüker minute 5buba nung Shamsher Singh-i mezüngbuba goal yok, iba sülen Ajay Yadav-i minute 39 aser Akashdeep Singh-iminute 58 nung UPW telok pur atema goal kaka yok.
Netherlands nunger asayar Mirco Pruyser-i minute 31buba nung Punjab Warriors asoshi goal ka yok.
HIL nung field goal shia goal anana amai züngshir.
Iba asaya nung UPW purtem ball benshiba aser defense nokdakba nung Punjab dang nungi tajungba liasü, aser iba ajanga Punjab purtemi goal magütsütet.
UPW puri mezüng goal yokba ajanga parnok asaya nung tejakdang liasü, aser iba ajanga Punjab-pur defensive kümadok.
Mezüng goal yokba sülen Ramandeep-i pass agütsütsü merangdang Punjab nunger defender Jasjit Kullar tetsüng nung ondak, aser iba ajanga parnok penalty corner ka angu, saka goal magütsütet.
Punjab nungi asayar Mirco Pruyser-i minute 31buba nung goal yoka goal kasa aküm.
Asaya 3buba shilem nung Punjab defense makangba ajanga Ajay Yadav-i UPW pur atema tanabuba goal yoka par telok maneni temaba jenjangi atu.
UPW puri goal yoktsü asoshi maongka aika angu saka iba mapang Punjab-i defense-i kanga junga nokdang.
Asaya atemtsü minute 2 lia Akashdeep-i circle tema nungi goal kanga junga yokba ajanga tatem nung telok ana tsüngda goal 6-2 agi tembang.