HIL: Ranchi Rays-i goal 2-1 agi Waveriders akok

Ranchi, January 26 (Agencies): Skipper Ashley Jackson-i goal 2 tashi agütsüba yong par Ranchi Rays teloki goal 2-1 agi Delhi Waveriders telok madak takok ngua tang tasayadak Hockey India League (HIL) asayamong nung tanü Mongolbar nü shilem agiogo.
Tanü takok angubaji defending champions, Ranchi teloki tan asayamong nung tanabuba asaya akoker lir.
Rupinder Pal Singh-i asaya tenzüker minute 27 buba nung goal 1 agüja par Waveriders telok temaba jenjang nung ajungketttsü.
Ajisüaka, Jackson-i minute 29 aser 31 buba na nung penalty corner 2 tashi takok ngua zükokja par telok nem tanü takokbaji bener arutsü.
Ranchi teloki taoba asaya nunga goal 4-2 agi Uttar Pradesh Wizards telok madak takok ngua liasü.
Tan takok anguba ya densema, Ranchi teloki asaya 3 nung ajak agi points 11 ngua tan asayamong nung temaba jenjang nung alir telok tarensen nung 4 buba jenjang nguogo.
Waveriders teloka Ranchi telok sülen anidaka tang 3 buba jenjang nung lir.
1 buba aser 2 buba jenjang nung alir, Kalinga Lancers aser Jaypee Punjab Warriors telokia Ranchi aser Waveriders telok den sako points, 11 ajangzüka lir saka par teloki goal timba agütsüba yong tang temaba jenjang ngua lir.
Asüng, Bodbar nü anisüngzükba sülen Ranchi teloki Kalinga Lancers telok den tan Brehostibar nü asayatsü aser Wavriders telokia Dabang Mumbai telok den tan Hokolbar nü ajuruteptsü.