Hill Theatre, Nagaland ajanga ‘Beautify Dimapur’ sentong ayongzük

Dimapur, May 16 (TYO): Hombarnü Hill Theatre, Nagaland aser Dimapur District Administration külemi Supermarket Area, Dimapur nung ‘Beautify Dimapur’ omen nung ajemdaker yimdong nung jilushi ia ‘waste material Art’ sentong ka agi. Lenmang, kelentzü, tzü mopung menenba, jana mashi indokba agi sünga liaka Northeast India nung Dimapur ya kanga kera ainba jila ka lir, aser iba ajanga tanga state nung aliba nisungtemi Dimapur semdangtsü kanga jangrar.
Asen jila temerikba kümdaktsütsü nükjitong nung Hill Theatre, Nagaland ajanga ‘Beautify Dimapur’ sentong ya tenzük. Jana indokba nungi oset bendena mapa tajung inyakba (Waste material Art) ka Limanungdang Longchar ajanga sayu aser Sennang Longchar aser Kilang Imsong-nati direct asüba yimdong jilushi ka ayi.
Maneni iba project nung Dimapur indang Deputy Commissioner, Kesonyu Yhome IAS-i molungsoa yariba asoshi pelaba osang ka Hill Theatre ajanga metetdaktsü.