Hillary Clinton-i otsü tasen yanglur

California nung agiba election nüboyimtsü sentong nung Democratic yimtenren telok nungi Tir candidate, Hillary Clinton (Tiyongtsü)-i külem yimtenren telokpur, Karen Bass aser Maxine Waters na den aroki pelatepba noksa ka yangi angur. (California, June 07)

Washington, June 07 (Agencies): Taoba US Secretary of State, Hillary Clinton-i otsüsütsüsa US Tir menden asoshi tokteptsü jenjang angur mezüngbuba tetsür candidate akümtsüsa jenjang tajung nguogo.
US nung tentetba Democratic Party yimtenren telok nungi US Tir candidate shimba maparenji taruba July ita tatemlen ang agitsü saka Hillary-i la pusemer timba, 2,383 tashi ngua, külem yimtenren telok nungi candidate, Vermont Senator, Bernie Sanders den temaba jenjang nguogo.
Tanü tashi nung lai temaba jenjang nguaka, maneni state 6 tashi nung vote agitsü maparen anendaka aliba yong lar teloki tali kümdangshitsü olen ka Hillary-i metetdaktsüogo.
Tanü, Mongolbar nü tongti primary vote agütsütsü sentong agiba sülen tanüngba delegate 851-i shiba pusemtsü iba osang jangja akümtsü.
Ano külen, “Osangbentsü teloktemi Hillary nem temaba jenjang ano jungi agütsür kechiyong tang la pusemba superdelegate-temi Democratic telok nungi Tir candidate shimtsü sentong agiba jakdang temulung meyiptsü akok,” ta Sanders’er otongdar, Michael Briggs-i metetdaktsüogo.
“Ozü candidate, Sanders jenjang Republican yimtenren telok nungi Tir candidate, Donald Trump den tajungba lir ta superdelegate-tem dang angatetdaktsütsü anünga lir,” ta pai ashi.
Republican telok nungi US Tir menden asoshi candidate shima alisang, Trump den tokteperi election nung toktepba maparen anenba sülen Trump pusemer jenti aküm aser ibaji mesüka, Sanders pusemertemia tatem nungbo Hillary pusemtsü teimla lir.
Taküm February ita 1 nü nungi tenzüka, Democratic aser Republican yimtenren telok nung tenüng züluoka alirtemi taruba US Tir shimtsü maparen nung shilem agia aruogo aser iba maparen ya taküm November ita 8 nü tashi nung ang tembangtsü.