Hillary Clinton-i Trump den temaba jenjang ngua lir

Washington, October 18 (Agencies): Democratic yimtenren telok nungi US Tir menden atema candidate ama toktepla, Hillary Clinton-i Republican yimtenren telok nungi Tir candidate, Donald Trump den noklang nung shilem 12 agi points timba anguba osang bushitetogo.
Nüburtem rong nungi osang bushitsü mapatong, Monmouth University osang tan Hombar nü sangoktsüba sülen Clinton-i vote noklang nung shilem 50 aser Trump-i shilem 38 tashi anguba osang jangjaogo.
Tan Clinton-i temaba jenjang angubaji taoba September ita agiba osang bushitsü mapatong agidang bushitetba den tan points 8 agi Trump den temaba jenjang angur lir.
Taoba US Secretary of State, Clinton-i taoba September ita agiba Monmouth osang bushitsü mapatong ajanga bushitetba dena tan point 4 agi temaba jenjang anguba osang jangjaogo.
Tan osang bushitetba ya Trump-i tetsürtem anema tashiyim inyakba osangtem jungkai adoka benshitsü tenzükba sülen tan mezüngsüa nüburtem rong nungi osangtsüsang agitsü mapatong inyaker lir.
America nunger vote agütsütsü temeten alir nisung noklang nung shilem 62-i Trump-i asangsang nung aibelen ta bilemba aser tanüngba nübur shilem 58-i pai aibelena meinyak ta pa dak temulung lema aliba osanga bushitetogo.
Trump pusemtsü mulunga alir nisung noklang nung shilem 32 nungi 26 tonga, points 6 agi tajemba akümba aser pa pusemtsü memulungi alir noklang nung shilem 57 nungi 61 tonga, points 4 agi timba akümba osanga jangjaogo.
Tan bushitetba Monmouth University mapatong ya America ajunga nung vote agütsütsü temeten alir nisung 805 tashi den telephone ajanga tongtepratepa, tan October ita 14-16 nü tashi agia liasü.