Hillary Clinton Trump den 8 % agi temaba jenjang nung lir

US’er Ohio state kübok Cleveland yimti nung tentetba John Marshall  High School nung ayongba election nüboyimtsü sentong nung shilem agirtemi Democratic telok nungi Tir candidate, Hillary Clinton den ajuruteptsü atadang agiba noksa ka yangi angur. (Cleveland, August 20)

Cleveland, August 20 (Agencies): Democratic yimtenren telok nungi US Tir menden asoshi candidate ama toktepla, Hillary Clinton-i Republican telok nungi Tir candidate, Donald Trump den noklang nung shilem 8 agi temaba jenjang anguba osang ka Reuters/Ipsos teloki bushitetogo.
Tan August ita 14-18 nü tashi US nübur rong nung osangtsüsang agia senzüba sülen taküm November ita 8 nü agitsü agitsü election nung US nütsüng yongsük noklang shilem nung shilem 42 tashi Clinton pusema la nem par vote agütsütü renemba aser shilem 34 tashi Trump pusemtsü renemba osang bushitet.
Ano, nübur noklang nung shilem 23 shi Clinton mesüra Trump pusemtsü asoshi lemteta maliba osanga bushitetogo.
Clinton-i taküm küm shilem tuluba ka Trump den temaba jenjang ngua lir aser taoba July ita agiba Republican aser Democratic telok mongdang mapang nungi tenzüka lai tanü tashi Trump den jenjang tajungba anguba osang bushitetogo.
Clinton aser Trump napronglai vote agüja tena pusemtsü asoshi nüburtem ajungmesotsü maparen nung timtem jenti ajurua lir kechiyong US nübur timbakati tenaprongla par lenir kümdaktsütsü asoshi memelungi lir.
US nütsüng yongsük shilem 3 nung shilem 2 tashi par US linüki Clinton aser Trump na Tir candidate shimba ajanga yimtenren sabang nung mera aibelena agiogo ta tangatetba yua lir.
Ano külen, Obama-i aniba US sorkar kübok Secretary of State ama lar linük tenzükdang adokba email den sentakba ken o nung lai tezüluba nung kuli tejangja agütsütsü asoshi okadaki Clinton nem tetuyuba ka agütsüogo.
US kübok tentetba state 50 prongla nung alir vote agütsür nisung 1,119 aser vote agütsütsüsa jenjang ngua alir nisung 1,118 rong nungi osangtsüsang agiba sülen Clinton-i Trump den temaba jenjang anguba osangji Reuters/Ipsos-i bushiteta liasü.