Hillsong Conference nung Morrison-i Australia atema sarasademtsü

Sydney, Chiteni/July 10 (Agencies): July 09, 2019 aonung Hillsong Conference tenzükba sentong nung Ato Kilonser Scott Morrison-i Australia atema sarasademtsü aser linük nung Khristanpur timtiba adenshia alidak tarutsü nung Khristanpur asoshi tamangba yimsü temeden ngutettsü tim ta ashi saka Australia-i temeim tali nüngdaker, ta ashi.
Hillsong founder aser global senior pastor Brain Houston-i Sydney kübok Qudos Bank Arena nung agiba mungdang nung adenshia alirtem den jembiba mapang, Khristan ka asütsü maongka ngutetba mepaidoktet, ta ashi aser pai Pentecostal ato kilonser aser pa kinungtsü Jenny na sabangi jaketba mapang ato kilonseri sarasadem.
Ato kilonseri mungdang nung adenertem dang ashiba agi, pa kinungtsü tenabo küm aika Hillsong Conference nung dena aru aser taoba mungdang nung Singapore nungi pastor Joseph Prince-i Yohan otsü pa taküm athishia jembiba bilemteta ashi. Yohan ya nüngja balaka masü saka Khristanpur ajaki amshitettsü, shiba Tsüngremi meima liasü, ta Prince-i taoba mungdang nung shia liasü. Pastor Joseph Prince ya taküma iba mungdang nung o jembir ka lir.
Nisung 21,000 dena alima mungdangsanger den jembiba mapang Ato kilonseri, “Ibaji asenok ajaki nüngdakba lir. Ibaji asen linüki nüngdaker. Aser asenok Khristan ka ama ibaji inyaktsü yangi lir. Tangar mapa inyakba medemdangtsü atema mashi. O kisüng jembia kazütsü atema masü. Tsüngrem temeim indang sayutsü asoshi yangi lir,” ta ashi.
Ato Kilonser Scott Morrison ya Hillsong Conference tenzükba aonung pa kinungtsü Jenny den külemi arua aden.
“Kü mapaji nenok mapa ama kasa dang lir: Tsüngrem meimtsü, nübur meimtsü. Asenok ajak mapa sako lir,” ta pai ashi.
Ato Kilonseri kangadang tongtibang kar atema sarasadem, aser itemji sepai tejentemi meranga inyakba; lanur shirnoki pei sasa taküm tembangtsü bilemer; lanurtemi timtem balala ajuruba; tezülen aliba Indigenous kintem; mata-mabensa nisungtem; aser tzüngsarosa agi timtemba anentsü asoshi tzünglu jazüka sarasadema liasü.
Houston-i Morrison dang pai takok anguba mapang jembiba, “Ni sayatenya nung amanger,” ta asüba indang ScoMo dang nai shidakba sayatenya nung amanger asü, ta asüngdanga liasü.
“Hao ni amanger!” ta Morrison-i mulungsoa langzü. “Küm 17 ataa lir ozü jala ya 7/7/2007 nung aso! …Iba linüki temeim tali aser tangar dang dak tai apuba tajemba nüngdaker,” ta Australia ato kilonseri ashi.
Khristanpuri pa atema koma sarasademtsütsüla, ta asüngdang dang, “Mezüngbuba nung sarasademang! Asen linüki sarasadem tali nüngdaker! Aser lenirtem ajemalutsü, aser Pai anguba angutsü asoshi shisatsü aser tejakleni aotsü atema sarasademtsüla,” ta pai ashi.
Morrison-isa ashiba agi, “Taochi alitsü asoshi sarasademtsüla. Taochi ya tesüngmangtsü ka lir. Nisung kari iba atema ken ka zülutsüla!” ta pai menürema ashi aser iba mapang lokti ajunga menüa liasü.
“Iba linük nung Khristan ka ama nüchiso aser temeden atema kanga jembir. Tamangba yimsü temeden ya iba linük indang fundamental ka lir – kechi tamang sa südir süaka. Nai ka nung amangaka mesüra mamangaka!” ta ato kilonseri ashi.
Soviet Russia nung missionary temi otsü ashiba pai angazükba indang bilemteta jembi. Reshikangshi timtem balala ajurur aliba Khristantemi parnok temeden asosho ashishiba otsü nai mangashitsü… Iba tensa nung parnok dak temeim liasü aser parnok Tsüngrem asoshi liasü. Ibaji parnok telangzüba aser iba linüki temeim tali aser tangar dak tai apuba tajemba nüngdaker, ta Morrison-i ashi.
Khristanpur atema tarutsü asoshi tamangba yimsü temeden ya wazüka ayutsü tim asü masü ta ato kilonseria amanger, ta Houston-i asüngdang dang, Morrison-i, pai amanger aser iba atema pai teti shisadanger, ta langzüa liasü.