Hima Das tenüng nung keyi techanu ka tenüng jatsü

Guwahati, Chiteni/July 29 (Agencies): Bengaluru nung Bannerghatta Biological Park ketdangsertemi ita trok tain keyi techanu (tetsü) ka India nünger rongnung nüngtugu athlete Hima Das tenüng nung jatsüogo. Lai ita ka tsüngda gold medal pongu ngutetba tushitsü atema iba jenjang ya agi.
International Tiger Day matong tsüngda keyi chanu Hima ya July 28 nü nikongtsütsü Safari zone-i tanga keyi techanu asem den chiokogo.
Hima-i international jenjang nung mezüngbuba gold medal 2019 küm July 2 nü Poznan Athletics Grand Prix, Poland nung tetsür 200m asemtepba nung angu. Iba sülen lai July 7 nü Poland nungsa Kutno Athletics Meet nung tanabuba gold angu.
Tasembuba gold medal ya lai Kladno Memorial Athletics Meet, Czech Republic nung July 13 nü angu aser Tabor Athletics Meet nung July 17 nü pezübuba gold medal ngua liasü. Iba sülen 400-m asemtepba nung lai July 20 nü Czech Republic nungsa goal medal ngua ita ka tsüngda gold medal pongu koktetogo.
International Tiger Day nüngtem nung nüburtem nem reprangdaktsütsü asoshi keyi tetsüti ka den techanu ti chiokogo. Item keyitem ya Principal chief conservator of forests Ravindra DS-i chioka liasü.