Himachal gari lendong balala nung nisung 22 asü

Shimla, May 21 (Agencies): Himachal Pradesh nung gari  lendong balala ana nung nisung 22 asü aser nisung 20 dak tema yiruogo.
Yasüng tesü Kinnaur district nung Bada Kamba anasa Chaura-Kamba lenmang nung nisung 14 mena aliba gari ka lenküboki metre 300 ia tsükokba lendong nung nisung 12 atanga asü aser nisung ka len tom nung asü, ta police-i ashi.
Gari nungji nisung tali amenba ajanga iba lendong atalok, ta police-isa ashi.
Tanabuba tatalokba nung state meyong HPSTC bus Chopal nungi Tharoch-i aodang Shimla district kübok Theog sub division nung aliba Bajroli Bridge anasa bus ji tsükok aser iba lendong nung bus anisang aser yaritepsang na densema nisung 9 asü.
Shimla Deputy Commissioner, Rohan Thakur-i, nisung pezü iba tesem nungjisa atanga asü aser nisung pongu mozükidangi anir aodang len tom nung asü, ta metetdaktsü.
Yirua alir nisung 20 dak tema Theog nung aliba mozüki ka nung yaridar aser parnokji Shimla nung aliba Indira Gandhi Medical College-i anir aotsü atema tuyuogo, ta paisa ashi.
Asür kibong shia nem district administration-i senotsü teyari  50,000 agütsüogo aser police-i item tatalokba kuli bushisüngdangdar.