Himachal nung BJP CM candidate Kumar Dhumal-i tamakok angu

New Delhi, December 18 (Agencies): Himachal Pradesh assembly election nung BJP-i takok ngua Congress sorkar atsüngdokogo, ajisüaka BJP chief minister candidate, Prem Kumar Dhumal-i tamakok angu.
Sujanpur menden nungi toktepsang Congress candidate, Rajinder Rana-i pa madak takok ngua liasü.
Tanü election osang sangdongba sülen Dhumal-i party candidate tem nem tenüngsang agütsü.
“Constituency nung voters tem indang ashitsü makok. Iba ama tensa ka nung shinga nem-a tai tongloktsütsü madoker. Ni pusemer ajak dang ni pelar,” ta pai ashi.
Pai tamakok angubaji tesülen asadangtsü, ta paisa shisem.
Taoba mapang anaben tashi Chief minister inyaksang, Dhumal-i tamakok angu nungji CM menden atema takok angur candidate ka shimtsü.
Taoba state election nung Rana-i independent candidate ama toktepa takok angu, aser 2014 küm pai Congress nung den-a liasü.
Osang angazükba agi, arishi küm 73 Dhumal ya Rana atema yimteren nung tesayur ka medem liasü, ajisüaka tan election nungi Rana-i pa madak takok nguogo.
Election nüboyimba mapang nung Rana-i, “Ni mejembiaka kü mapatem ajanga niji shiba’ar sayur. Nüngtugu (Dhumal) ji mezüngshir aser nüburtemi ibaji ajanga obendang agütsütsü. Ni constituency nüburtem atema anogoshia alitsü, aser nüburtemi ibaji meteta lir,” ta jembia liasü.