Himachal nung nashi shibelener ka tepset

Nahan (Himachal Pradesh), October 16 (Agencies): Tanü Himachal Pradesh, Sirmaur district nung lokti kati nashi shibelener ka tepsetogo aser pa den yariteper nisung pezü police-i ghonda pezü arishiba sülen arem nung puogo.

DSP Pachhad, Yogesh Rolta-i ashiba agi, local nisungtemi nashi shibelener pongu dak azük aser tang parnok hospital nung lir.

Truck ka nung nashi pongu aser jang ter bener oa anguba sülen local nüburtemi gariji arishia ao. Lendong ataloktsü ta meteta truck anisang jagi gari ka dak teselen nungi atsük, ta Rolta-i ashi.

Ajisüaka police aser nüburtemi arishiba ajanga truck anisang jagi gariji Lawasa Chowki square nung anen aser nashi kar gari nungi aludaktsü. Nashi ka asü aser tanüngbaji kanga mejungi yiru, ta ketdangserisa ashi.

Truck ji toktsür nashi shibelener ponguji Lawasa Chowki anasa jenoka lia nüburtem teyari ajanga police-i par ponguprongla apu.

Police dang nungibo yimtak alirtemji timba asüba yong police-i menokdangteti nashi shibelenertem dak azük, ta police osang ajanga ashi.

Pua alir rongnung UP, Saharanpur nungi nisung ka tenüng agi Noman (28) Sarahan hospital nung asü.

Asür kinünger Imran-i ken o agütsüba sülen Panchad police-i IPC Section 302 kübok nisung tepsetba ken o ka benokogo.

Ano tanüngba nashi shibelener pezü anema Cruelty against Animals Act kübok ken o balala benokogo.