Himachal nung samartem tiprongla nguogo

Manali, March 13 (Agencies): Himachal Pradesh, Kullu district nung tenemleni atur engineering kaketshir 8 samar ghonda 50 shi bushiba sülen tayimtsü ajanga bushidang Chandrakhani Pass tesem anasa parnok ajak nguogo, ta Deobarnü police ketdangser kati metetdaktsü.
ANI osangbener den jembidang Kullu Deputy Commissioner, Hans Raj Chauhan-i, tayimtsü nungi bushidang parnok iba tesem nungji angu, ta ashi.
Engineering kaketshir 8 ji Chandrakhani Pass kübok Parvati Valley anasa tenemleni atudang tsüngsang majungba ajanga sama.
“Tenemleni atur ti rongnung parnok trok Chandrakhani nungi tayimtsü ajanga Kullu anasa aliba Rumsu yim-i anir ao. Tanüngba anajia nguogo,” ta Raj-isa ashi.
Punjab nung aliba Sant Longonwal Institute of Engineering & Technology nungi kaketshir tenet aser parnok tesayur ji Hokolbarnü tsüngsang majungba ajanga Chandrakhani pass tesem nung samaba sülen parnok den anogo asem tashi tongtepratep mesüteti liasü.
ITBP telok asem den local mountaineering institute telok ka aser police-i parnok bushi, ajisüaka tsüngsang majungba ajanga manggu.
Yashi-a helicopter ka amshia bushia liasü saka takok mangu.
Tesüiba küm 20 nung tenemleni atur nisung jenti iba tesem nung süogo aser aika samaogo. Yaküm August ita nunga Poland nunger nisung ka tenüng agi Bruno Muschalik samaba sülen kanga bushitep ajisüaka mangu.