Himachal Pradesh election atema BJP-i candidates 68 tenüng sangdongogo

New Delhi, October 18 (Agencies): Himachal Pradesh state assembly elections atema Bodhbarnü BJP-i party candidate tem tenüng sangdongogo; aser candidate 68 rongnung taoba mapang chief minister, Prem Kumar Dhumal aser Himachal Pradesh BJP tongti, Satpal Singh Satti na densema lir.
BJP candidates 68 rongnung Congress lenir tain Sukhram’er jabaso Anil Sharma-a densema lir; tawa pai par party toktsür BJP nung dena liasü.
State nung taoba mapang Chief Minister anaben tashi inyaksang, Dhumal-i pa indang constituency, Hamirpur nungi masü saka Sujanpur menden nungi ang tokteptsü.
Tang Congress-i yimsüsüba state, Himachal nung BJP sorkar tashii arura Dhumal mesüra Union minister, J P Nadda chief minister shimtsüa akok. Ajisüaka tang tashi nungbo BJP-i chief minister candidate sangdonga mali.
Taoba hopta BJP Central Election Committee senden mena state nung candidates shima liasü. Iba state nung kenüyongi dang election agitsü. November 9 nü election agitsü aser December 18, 2017 nü vote azüngtsü.
Osang angazükba agi, Congress Tir, Sonia Gandhi leniba nung Central election committee senden amenba sülen kobi melii Congress-ia party candidate tem tenüng sangdongtsü.
Congress nungi chief Minister candidate ji tang teinyakdak Chief Minister, Virbhadra Singh asütsü ta sangdongogo.