Himachal Pradesh nung IAF-i nisung kümzükba maparen tembangogo

Shimla/New Delhi, Rongjui/September 29 (Agencies): Himachal Pradesh kübok Lahaul Valley nung anogo pongunü tashi kümzükba maparen inyaka arur tanü tembangogo.
Rongjui/September 22 nungi 24 nü tashi state tesem aika nung tenemlen rürjep tali alaba den tzünglu sashia aruba ajanga state nung timtem ajurua liasü.
Indian Air Force (IAF) sepaitemi tayimtsü ajanga nisung 252 aser BRO-i gari lenmang ajanga nisung 4,770 kümzüka liasü.
IAF sepaitemi kümzüker rongnung timbaka raliwalirtem liasü aser parnok rongnung Germany, Norway, Denmark aser Nepal linüktem nungi raliwalirtem aika liasü.
“Tensa asadangba sülen India sorkari tetuyuba agutsüba ama tayimtsü nungi kümzükba maparen anenogo,” ta ketdangsertemi metetdaktsü.
Osangbenertem den jembidang State Tribal Development Minister, Ram Lal Markanda-i, tawa rürjep alaba ajanga apple tsünüba shilem 80 den electricity supply shilem 90 raksatsüogo, ta metetdaktsü.
Lahaul-Spiti district nungbo electricity ji anogo 10 nü tashi nunga yanglutettsü.
Yashi Keylong densema tenemlen rürjep kanga alaba ajanga nikongdang IAF sepaitemi raliwalirtem kümzükba maparen khenpiga anena liasü.
Iba dak sendakba nung Kullu Deputy Commissioner, Yunus Khan-i, nüngdak dang süra taruba anogo ishika tsüngda kümzükba maparen asentenshir tenzüktsü, ta metetdaktsüogo.
Khan-isa, kümzükba maparenji lenla asemsü lemsar inyak- mezüngbuba nung kanga lendong aketba tesemtem nungang IAF-i raliwalirtem kümzük, tanabuba nung Border Roads Organisation (BRO)-i gari lenmang ajanga nisungtem kümzük, aser tasembuba nung administration-i IAF aser BRO naprong den yaritepa liasü.
Rohtang Pass nungi Baralacha Pass tashi rürjep merüktetba maparen kobi melii tembangtsü, ta Khan-isa shisem.