Himachal, Shimla anasa anentsüh tulu alua gari aika anenbang

Shimla (Himachal Pradesh), September 02 (Agencies): Honibar nikongdang Himachal Pradesh kübok Chandigarh-Shimla national highway nung anentsüh tulu alua tajemba agi gari trok den tekülem ki ka anenbangogo.
Anentsüh ajanga gari lenmang tezülen anena aliba garitem anenbang, ajisüaka tang tashi nungbo nisung asüba mesüra yiruba osang mali, ta osang ka ajanga metetdaktsü.
Hokolbarnü tzünglu sashia aruba sülen tekülem ki tiplen aliba shilem tilaka tera anenoka ai, ta osang angazüker.
Anentsüh alutsü minute 15 shi lia long tulu kar temalen nungi alu, aser ibaji ajanga lenmang nung gari nung senzürtem aser tesüng agi senzürtem jet ta aienshia liasü.
Police-i iba lenmangji nokdanga nisungtem aienshidaktsüogo, aser tang garitemji Sanjauli adena senzüdaktsüdar.
Item gari rongnung gari ka kibur, Vipul Sharma-i, pa indang gariji tekülem ki anasa anena ayu, ta ashi.
“Medemer kati anentsüh aluba osangji kü nem phone ajanga metetdaktsü. Ni anena ayuba anasaji ano gari aika anena liasü,” ta paisa shisem.
DSP, Rajinder Singh-i, “Police iba tesemji tongogo aser iba tesem nungjagi gari aser nisungtem aienshidaktsüogo. Tang tashi nung onoki nisung asembo kümzükogo,” ta metetdaktsü.