Himalaya tenemtem Cm 60 atemogo

London, January 12 (Agencies): Nepal nung April, 2015 nung menoknok tesashi anokba ajanga Himalaya tenemtem centimetre 60 atemoka ai, ajisüaka alima nung tenem rongnung talangtiba, Mt Everest (metre 8,848) bo iba asetshiba agi medangshi, ta bushisüngdangertemi ashi.
Bushisüngdangertemi satellite technology amshia yaküm April ita nung Nepal nung menoknok anokdang Himalaya tenemtem centimetre 60 atema aiba putetogo. Iba menoknok ajanga nisung 8,000 dak tema taküm samatsüogo.
Mount Everest ya menoknok anokba tesem nungi kilometre 50 dak tali agi pilar lir, anungji iba tetsüngda alibaji ajanga iba tenem yabo atemoka mai, ta parnoki ashi.
Bushisüngdangertemi ashiba agi, item tenem aser Nepal na tanet kasa nung aliba ajanga menoknok anokdang kongshir.
Iba tangshitepa ya ali telung nung kilometre 20 shi lua lir aser ibaji atsütepdang item tenemtem temaleni tera nungteta adokdaktsü.
Iba tezü nung aliba tesemtem ya maneni nungteta adoker aser ibaji ajanga menoknok manokdanga item tenemtem aiener amai ngur, ta Oxford University nung iba bishisüngdang nung lenir John Elliott-i ashi.
“Menoknok anokba mapang iba tesendaktep aliba tezü nung kongshiba ajanga nungteta adoka alibaji meyipa ludaktsü aser ibaji ajanga tenemtemji tera asongoka idaktsü,” ta Elliott-i ashi.
“Onoki satellite technology tasenba amshia alimang tatsü talang akümba asadangteta liasü. April nung menoknok anok tenzükdang yongi Himalaya tenemtem centimetre 60 atemoka ai,” ta Elliot-i ashi.
Iba bushisüngdang ya Nature Geoscience kaket nung adokja lir.