Himanta Biswa-i Congress lenirtem aitsü

Guwahati, November 1 (Agencies): Assam Health Minister aser Bharatiya Janata Party (BJP) lenir Himanta Biswa Sarma-i Mongolbarnü, Congress puri linük naklo ken atendang nokdaktsüba anemba atema parnok aitsüogo.
Osangbenertem den jembidang Assam Minister-i ashiba agi, “Congress nung züngsemtemi Pidi atemabo nokdakteter, saka linük naklo ken atendangbbo menokdakner. Iba yabo magizükteter.”
“Congress otongdar timba kati nüburtem movie sayuba tesem nung linük naklo ken atendang menokdak yong ajungtsü, ta ashir. Rahul Gandhi-i yimjak nung ashitsüla,” ta Sarma-i ashi.
“Item nisungtem yagi Pidi atemabo nokdakteter saka linük naklo ken atemabo menokdakner, iba ya tesüngmangtsüka lir. Rahul-i linük nakol ken akhüm tsübuner asü metsübunerar yimjak nung ashitsüla,” ta paisa ashi.
Rajasthan nung Jaipur Municipal Corporation-i staff tem dang anepdang shia linük naklo ken atentsüba aser nikongtsütsüshia linük ken atentsüba atema tetuyuba ka agütsüogo. Anepdang linük naklo ken atemba sülen biometric system attendance magizüktsü.
Iba teteyuba ya Jaipur Municipal Corporation ajanga Sardar Vallabhbhai Patel asoba bilemtetba anogo nung agütsü.