Himanta Biswa Sarma-i Lakhimpur & Dhemaji nung nübo yimtsü

Lakhimpur/Dhemaji, Yimpoksüi (November) 26 (Agencies): Assam PWD, Health and Finance Minister Dr. Himanta Biswa Sarma-i Hombarnü Lakhimpur district nung Panchayat election atema nübo yimtsü.
PWD Minister-i tanü Leelabari, Ujjwalpur, Azad aser Somdiri Gaon Panchayat tesemtem nung shilem agi.
Leelabri airport anasa Dr. Bhupen Hazarika Stage nung sentong ka nung o jembidang Sarma-i Lakhimpur MLA Utpal Dutta aitsü.
2016 assembly election nung pa nem vote agütsüba BJP züngsemtem Dutta-i ashioktsüogo, ta Sarma-i ashi.
Lakhimpur MLA Utpal Dutta-i taoba küm 25 tsüngda par constituency atema mapa kecha meinyaktsü aser Lakhimpur LAC area atema sen aruba tim mesüi amshi, ta paisa tai tongloktsü.
Telahi Gaon Panchayat areas nung gari lenmangtem yanglutsü atema sen crore 40 lemzüktsüba Lakhimpur MLA-i auyazüka agi, ta Dr Sarma-isa metetdaktsü.
Tanü Dr Himanta Biswa Sarma-isa Azad-Bahpati nung Lakhimpur MP Pradan Baruah-i ayongzükba football asayamung ka lapoktsü.
Tanep pai Dhemaji district semdang aser Jonai HSS playground nung election nüboyimba sentong ka nung o jembi.
BJP-i aniba state sorkari Dhemaji district nung gari lenmang aser community health renlokdaktsütsü atema sen peria lemzüktsür ta pai metetdaktsü.
Congress-i küm 15 tashi Assam nung sorkar yimsü süa arudang panchaytiraj raksatsü saka BJP sorkari asentenshidaktsüogo, ta paisa shisem.
Congress aser AIUDF teloktem ya Assam nunger atema tsükchirtem lir kechiyong parnoki Assam nung bendangertem lidaktsütsü meranger, ta Sarma-isa ashi.
Sorkar den yaritepba telok- Asom Gana Parishad (AGP)-i panchayat election nung BJP den meyaritepba atema Sarma-isa sasa bilemba olen ka lemsatep.
Iba sentong nung Lakhimpur MP Pradan Barua (BJP), Jonai MLA Bhuban Pegu (SGS) aser state BJP lennir Ashini Pait nungertemia o jembi.