Himanta Biswa Sarma-i sen crore 3 agi: Mamata

Guwahati, February 5 (Agencies): Saradha chit fund ochimashi ken o nung Assam finance minister Himanta Biswa Sarma tenüng tetshiba mesamar.
Mongulbarnü West Bengal chief minister Mamata Banerjee-i shidi ka yimjak nung sayuba nung ‘Sarma-i sen crore 3 shi pa dang nungi meshia agiogo ta iba ken o nung tongti süa tai tonglokja alir Sudipto Sen-i CBI dang shia lir.”
“Temaba jenjang nung alir nisung kati ni ashioktsüogo. Paji Hemanta (Himanta) Biswa Sarma lir. Taoba küm ka ser tesadang yutsür, tesüiba ita trok tsüngda pai kü dang nungi sen crore 3 shi meshia agiogo aser pa indang office executives-i vouchers kar nung tanga yimya agi sign süa lir” ta Sen-i shidi nung shia lir.
Saradha Group tanishir Sudipto Sen-i April 6, 2013 nü CBI dangi shidi ka züluba nung yimten yimsüsür aser ketdangser tongtipang kari pa küm ana tashi timtemdaktsü ta tapak 18 aketba shidi ka zülu.
Iba shidi nung Sen-i Sarma dena nisung 22 tenüng tetshia lir aser parnok jagi pa dang nungi sen meshia agi ta tai tonglokja lir.
Iba mapang Assam nung Tarun Gogoi-i aniba sorkar nung Minister Sarma ya Health & Education minister liasü.
“CBI-i Narendra Modi tetuyuba tashi angar. CBI-i opposition lennir kar tuteta mapa inyaker. BJP nung adenertem kümzüka lir aser parnok anema ola adokertemi timtem ajurur. Iba ya India nung magizüktsü. Asenoki rejutem kümzüka ayutsüla. Kechiba chit fund company tem dang nungi sen meshia agiba BJP lennirtem dak CBI-i mapa meinyaker” ta Mamata-i tanü metetdaktsü.
Sen-i züluba shidi nung Himanta Sarma tetshia aliba tapakji WhatsApp nunga kanga bulua prokshir.
Iba atema osangbenertemi Sarma den tongteptsü merang saka pai phone ka danga magizük.
Deobarnü West Bengal CM Mamata-i “Ni Assam deputy chief minister (Himanta) anema kuli aika lir. Prime Minister Narendra Modi aser BJP president Amit Shah pa aputsü jazüker” ta metetdaktsü.
Külen, minister Himanta Sarma-i ashiba agi, pa iba ken o nung kuli agütsür ka dang liasü aser CBI-i pa dang asüngdangya süogo.
“Ni kanga akhümtsübuba Mamata Banerjee-i kulitem magizüki kü dak tai tongloktsüba atema temulung raksar. CBI-i kuli agütsür ka ama asüngdangyaogo. Ni BJP nung maden dang nungi iba bushisüngdang nung aden” ta Sarma-isa ashi.
“CBI-i okadaki ni kuli agütsür ka dang ta shiogo. Anungji, Mamata-i ni aser ozü telok Saradha ken o nung dendaktsütsü merangba atema temulung raksar” ta paisa shisem.
2014 küm CBI-i Sarma dang asüngdangya. Assam nung mapa inyakdaktsüba ateam Saradha chairman Sudipto Sen-i pa nem ita shia sen lakh 20 agütsü ta tai tongloktsüba atema pa dang asüngdangya asü.