Himanta Biswa Sarma tepsettsü amokmerenba atema nisung 2 apu

Guwahati, December 8 (TYO): Assam Health & Education Minister Himanta Biswa Sarma bomb amshia tepsettsü ta asüba SMS ka prokshiba atema police-i Hokolbarnü nisung ana apu.
Nisung anaprongji Guwahati Medical College & Hospital nung mapa inyakertem lir, ta police-i metetdaktsü.
“SMS zülua prokshiba kuli metettsü atema onoki tena dang dang asüngdangya südar. Tenati iba SMS ji yimten lennirtem kar dena nisung aika dangi yok” ta Assam Director General of Police (DGP) Mukesh Sahay-i osangbener dang ashi.
“Jalukbari tesem nung sentong alidang parnoki education minister bomb agi poksetdaktsütsü ta SMS ka nung zülur prokshiba ajanga onoki tena apu. Parnoki iba atema sen crore 5 meshi” ta DGP-isa shisem.
Parnoki shitakba nung bomb amshia minister amaktsü tasa atong asü mesüra asayamenüa zülua prokshibaar onoki metettsü, ta paisa metetdaktsü.
“Onoki SMS ka anguba sülen iba SMS yokba indang mobile tsüngsü bushia tena apu. Iba ama SMS prokshibaji ozüng alema inyakba mapa ka lir ta IT Act nung lateta lir. Onoki iba ken o süoki ia agizüker aser ochi metettsü atema bushisüngdanger” ta paisa ashi.
Osang ka ajanga ashiba agi, iba SMS ji taoba Assam Chief Minister Tarun Gogoi, taoba Forest Minister Rockybul Hussain, Assam Pradesh Congress Committee (APCC) President Ripun Bora aser tangar aika dangi yok.