Hindi-a UN nung official oshi akümtsüla: Rajnath Singh

Bhopal, September 12 (Agencies): Honibar nü Union Home Minister Rajnath Singh-i, India nung kin telemsa aika aliba ajanga linük nung hindi oshi ajaki junga mamshitetba sasaa ashidang hindi-a UN official oshi ka ama akümtsüla, ta ashi.
“June 21 nü ‘International Yoga Day’ bo linük 177 nung mongteter kodaser hindi bo UN nung official oshi ka ama mekümtettsü? Asenoki iba nükjidong atongtsü asoshi meranga inyaktsüla,” ta Singh-i asem nü amungba ‘World Hindi Conference’ tembang nü ashi.
Tang UN nung official oshitemji English, French, Spanish, Russian, Chinese aser Arabic oshitem lir.
Osang ka ajanga UN kübok linük züngsem 129-i pu asem nungbo hindi-a UN nung official oshi rongnung ka akümtsü, ta ashiba sülen Singh-i iba o ya shia liasü.
Nüjiso asoshi rarba mapang hindi oshi ajanga linük nüburtem lungjemdakja liasü, saka linük nung kin telemsa onsara asüba agi tia makai hindi ya linük oshi (Rashtriya bhasha) mekümteti yimsüsür oshi (Raj bhasha) ang aküm, ta Singh-i ashi.
Ajisüaka hindi agi Kashmir nungi Kanyakumari tashi tesendaktep lidaktsür, ta paisa ashi.