Hindi oshi

Asenok India nung alir, anungji Hindi oshi ashitsüla. Iba jagi, talisa, tang center nung BJP teloki aniba government-i state ajak nung Hindi oshi ya kaketrejutem nung kangtepa sayudaktsüner. Ajisüaka, India nungersa süaka aikati Hindi oshi ya kangtepa sayutsü aser angazüktsübaji memulunger. Atangji, India nung yimten maparen nung amshitsü shimtetba oshiji Hindi aser English na ya lir, ibayongji tatar senden nung tatartemi iba oshi ana ya jembir aser yimten maparen nung item oshitem agi zülur. Item dakji alaka ano India nung state balala nung kin balalai jembiba oshi aika rongnung oshi metsü dak tali center government-i yimten maparen nung amshitsü melaa lir. Oshi tsütsü item inyakyim ajakji India nung temeyoktep kin aika aser kin shia oshi balala jembir asünungji, item ajakji züngoka, oshi ka mashi aser mejembitetba agi taküm nung takoksa angutsüsa mesüdaktsütsü atema linük nung sentong yanglurtemi shisa talang agi lateta yutsüba lir. Atangji, BJP nung tatar yimsüsürtemia itemji angateta alitsü, ajisüaka parnoki kanga akanga amitba aser amangba tangatetba kaji India ya linük temeja ka, anungji oshia ka dang asütsüla ta asüba tangatetba nung nokdaker. Ibaji dang masü saka linük ka anungji temzünga ka aser tamangba yimsüa ka dang asütsüla ta asüba nung parnoki kanga sashia jembir. Atangji, tamangba yimsü tsütsüa koba tamangba yimsü südir süaka shi temang dang masü saka tanüla dena jangratema anisüngzüka alitsüba tangatetba, teimla aser tekümtet indang sayur aser amanger, anungji Hindu nungertemi alima nung alir ajak Hindu nunger kümdaktsüner, Muslim nungertemia yamaji ajak Muslim nunger südaktsüber aser Khristan-temia nisung ajak Khristan kümdaktsüner. Iba nungji kecha tai mali saka tamangba yimsü kati danga tashiyim agi mesüra ozüng agi tamangba yimsü ka agizüka amangdaktsütsü merangra, ibajiang tai asütsü, kechiyong tashiyim amshia ozüng agi Tsüngrem külemdaktsütsü makok aser Tsüngremia ajibo maginütsü. Iba kasaji kibong akümba tsütsüa karbo rongsen agi alir, ano karbo tetsür ka dak tali agitsü melar saka karbo tetsür ka dak tali agitsü memelar, karbo kibong kümer tsüraburtem aser adianu kibongtem den külemi malir saka karbo kibong ajak külemi alir, ano yamaji senmangtsümang nunga kin shia aser tamangba yimsü shia sobaliba yimya balala lir, anungji India ama kin aser tamangba yimsü aika meyoktepa alidak ajak asoshi temzüng ozüng kasasa ka dang asütsübaji mapetba dang masü saka tamakoktsü. Iba kasaji oshi jembibaren nunga yimten yimsüsürtemi oshi tapu balala jembir ajakji senso tajung ka ama, parnoki jembiba pei tetsü oshijia akümketdakja ajungkettsütsü aser yimten nung meraketa amshitettsüsa lenmang sadema yutsütsüla. India nungsa süaka Hindi oshi ya India tiyonglen aliba state-tem nung dang bolua jembir saka talisa anüdoklen (Northeast) aser anülulentip (South) tsütsü aliba state-tme nungbo Hindi mejembir, anungji parnok asoshi Hindi ya bendanger oshi amai lir. Anungji, kodang India nung yimten maparen ajak nung  Hindi dang jembitsü aser Hindi agidang zülutsü ta ozüng küma latetdir, iba jagi Hindi mejembiba state-tem nung alirtembo kecha nunga shilem magitettsü. Tatsüba agi, zünger mapa bushirtema Hindi mashiba agi tatidanga magütsütettsü. Item ama timtem aser takoksa aika ajurutsüsa alinungji, center government-i linük nung Hindi oshi kangtepa sayutsü aser angazüktsü bilemba tangatetbaji melenshir, kangshia masü saka pei ajangzüktsü atema Hindi jembi aser zülu ashitsü asoshi ajungshitsüla. Asenok Naga nunger ama ya balala, Naga nunger oshi tatar senden nung mejembir aser mapa bushirtema tatidang magütsütetter, anungji English aser Hindi na prongla pei tetsü oshi ama jembi aser zülu ashitsübaji kanga tongtibang lir. India nung Hindi koma tongtibang, ibaji Delhi nung nüngdak senzüdang metettsü aser business inyakertemi angatettsü. Aji oda, senso shibai pei tetsü oshi den English aser Hindi na prongla junga jembiteta zülutetdir, pa mesüra lajibo alima nung taküm jangratema lia aotsü asoshi melarmelar asütsü.