Hindi oshi official küma amshitsü shisalemsatep

Shillong, June 6 (Agencies): Linük nung kin aser lokti ajak longjemshitsü mechi nung Hindi official oshi ama amshitsü asoshi sensaksemtsü atema ‘Use of Hindi as Official Language’ workshop anogo ana kaogo.
North Eastern Council (NEC) nung iba anogo 2 workshop ya Mongolbarnü tembangogo. Iba sentong ya Ministry of Development of North Eastern Region (DoNER)-i ayongzüka aka aser linük nung kin aser lokti balala longjemtsü aser tesenep nung alitsü nükjidong nung Hindi official oshi ama amshitsü asoshi tebilemdangbatem lemsatepa liasü.
Workshop lapokba setong nung Hindi Salahkar Samity, Ministry of DoNER nung züngsem Dr. Rajendra Singh Chandel, Shastri Vipan Khajuria, Dr. Balwant Shastri, Dr. Lakshmi Narayan Mittal, Ms. Sujaya Dey aser Dr. Kshirada Kumar Saikia nungeri northeast nungi tongtibang nisungtem indang taküm otsü Hindi aser India nunger oshi tanga nung zülua adoktsüba onük nung tali temolung agüja jembi.
Maneni tang sentongtem, Dr. Shailendra Chaudhuri, S.P. Singh aser Manas Ranjan Mahapatra nungeri achaayanga aka. Adviser Shri D. Khound, Adviser Gautam Chintey, Director, Sille Anthony, Director Edwinson Swer, Superintending Engineer Doba Jini nunger den külemi NEC nungi ketdangsertem aser North Eastern tesemtem nungi Ministry of DoNER kübok lokti balala nungi züngsem tem adenshia iba sentong nung o lemtepba nung shilem agi.
India nung Hindi official oshi ka ama amshitsü asoshi tebilembatem aser tebilemtsütem lemsateptsü asoshi tarutsü nung Ministry of DoNER-i achaayanga North East nung tanga tesemtem nunga iba amala mesükba workshop akatsü asoshi sentong aliba NEC ketdangsertemi metetdaktsü.