Hindi tesayur nem itasen magütsüba agi longkak aiter

Mokokchung, March 10 (TYO): State sorkari Hindi tesayurtem nem ita 9 tashi itasen magütsüba atema mepelaba sayua longkak aitba sentong ka March 10 nungi peipei SDEO sasep nung amungogo, aji sür ano March 15, 2017 nü Directorate of School Education Kohima nung longkak aitba sentongji alitsü sentong renema lir, ta tanü ANHTU Mokokchung Unit tir, Chubanükshii sangdong ka ajanga metetdaktsüogo.
Itasen aser arrears magütsüba kuliji central government nungi sen meyoker ta dang ashir. State sorkari onok nem mapang shitak nung itasen magütsüba ajanga mapang shia iba amai longkak aittsüsa kümdaktsür, ta ANHTU osang ajangasa metetdaktsü.
ANHTU-i state sorkar dang akhangba onüktemji mezüngbuba nung; appointment order nung aliba ama state kübok onok aitdaktsütsüla, kechiyong onok ya CSS kübok küm pungu atema itasen agüjaka, onok ya CSS kübok shimba masü. MHRD tetuyuba nung aliba ama March 2017 nungibo Hindi tesayurtem itasenji state budget nung aitdaktsütsüla.
Tanabuba; nung state nung tanga employee-tem ama Hindi tesayurtema ROP melenshiba ama, promotion atuba yimya, allowance balala, training aser maongka balala angutsü tim. Tasembuba nung; itasen magütsüi alibatemji arrear densema agütsütsüla.
Pezübuba nung; onok nem itasen ya ita shia (monthly basis nung) agütsütsüla aser state nung tanga employee nem agütsüba ama onok nema kasa maongka agütsütsüla, ta ANHTU Mokokchung Unit sangdong nungsa shisema liasü.