Hindi tesayurtem Dimapur Unit-i Silver Jubilee ayongzüka among

Dimapur, Mongputeni/October 04 (TYO): Hokolbarnü Town Hall, Dimapur nung All Nagaland Hindi Teacher Union, Dimapur unit-i Silver Jubilee den külemi 26buba State Level Hindi Divas 2019 ayongzüka mongogo, ta Hokolbarnü ketdangsertem osang ka ajanga metetdaktsü.
Iba sentong ya “25 years towards progress” omen nung ajemdaker agi aser tetushi tejaokerji Advisor, Sericulture, Excise & Minority Affairs, Zaleo Rio liasü.
Iba sentong nung jembidang Rio-i, “Hindi oshi ya nüburtem longjemdaktsüba oshi ka lir, kechiyong iba oshi ya linük official oshi lir,” ta ashi.
Iba dak sendakba nung pai, anungji Naga nungeri Hindi oshi angazüktsüla, kechiyong oshi ka tali angazükbaji tajungba dang, ta ashi.
Paisa Hindi tesayurtem dang azükaru aser terenlok atema mezüngpurtemi inyakba mapaji maneni asenokia inyaktsüla, ta ayongzük.
“Lokti aser state yangertsü atema tesayurtem ya linük tongtiret lir, aser tanurtem tarutsü tiaji tesayurtem ket nung lir,” ta paisa ashi.
Kasa sentong nung Additional Director, School Education, Razouseyi Vese-i Hindi tesayurtem dang tesüiba küm 25 nung state nung Hindi ajungkettsütsü atema kechisa inyaka aruogo, itemji meyipa reprangshitsüla, ta ashi.
Kasa sentong nung Vese-i Jubilee souvenir sayaja liasü.