Hindu Jagran Manch-i school tem nung Khristmas memungdaktsür

Lucknow, December 18 (Agencies): Uttar Pradesh kübok Aligarh nung Hindu Jagran Manch-i Khristmas mamungtsü atema tetuyuba agütsüogo.
HJM ya UP chief minister Yogi Adityanath-i aniba Hindu Yuva Vahini den züngsema lir.
School tem nung Khristmas amungba ajanga kaketshirtem Khristan yimsü agizüktsü atema mesüzüktsü akok ta HYM-i temulung malemer.
School tem nung Hindu nunger teimba lir aser kaketshirtem dang kazütsü aser sempettem bener arutsü ashir. Iba ajanga parnok melamela mesüzüktsü. Iba ama inyakyim ajanga Hindu nunger kaketshir tangatetbatem melenshitsü akok, ta Hindu Jagran Manch city president, Sonu Savita-i ashi.
Bajrang Dal züngsemtemi Khristmas carol atenertem dak temulung meyipdaktsüba tai tongloktsüba sülen anogo ishika dang lir Aligarh nung iba ya ataloker. Madhya Pradesh kübok Satna nung Hindu nungertemi carol atenertem züka merenshiba den külemi police station kima nung putir ka indang gari rongdoktsü.
Hindu Yuva Vahini ya 2002 küm Yogi Adityanath-i tentetba telok lir. Pa ya tang Uttar Pradesh Chief Minister nung teinyakdak lir aser taküm küm tetenzüklen pai pastor kati Hindu nunger Khristan yimsü agizükdaktsür ta tai tonglokja liasü.
Uttar Pradesh kübok Maharajganj district nung America nunger tourist 10 dena nisung 150 shi ka sentong ka agia lia, Hindu Yuva Vahini (HYV)-i ken o benokba nung ajemdaker police-i iba sentong anendaktsü. Khristantemi tamangba yimsü melendaktsür ta HYV-i ken o benoka liasü.
2014 küm Yogi Adityanath-i arogotem dang tenla ki adener tangalen Khristmas mamungtsü atema tetuyuba agütsü.
“Onok indang Ghar Wapasi ya tai ta parnoki ashir süra, Khristan missionary temi inyakbajia tai. Khristan putirtemi iba mesükba sentongtem ayongzükba aika administration-i anentsüogo aser tarutsü nunga nokdangtsüla” ta iba mapang Yogi-i ashi.