‘Hindu kiralongraba’ oren Shide-i mamshi: Chidambaram

New Delhi, August 01 (Agencies): Taoba UPA sorkari “Hindu kiralongraba” ta nüngja jaloktsüba ajanga India nunger kiralongrar anema raraba nung tashi meiti aküm, kechiyong kiralongraba nung tamangba yimsü mesüra kin telemsa mali ta Hokolbar nü Union home minister Rajnath Singh-i jembiba nung ajemdaker tanü taoba Union home minister P Chidambaram-i, taoba sorkar aitsütsü atema Rajnath Singh-i Hidu kiralongraba orenji alia jembiogo, ta ashi.
Chidambaram-i ashiba agi, UPA yimsüsüba mapang taoba home minister Sushil Kumar Shinde-i Hindu kiralongrabaji balaka nung amshia jembi, saka Singh-i jembibajibo khenyongi balaka.
Shinde-ia, pai Parliament nung ‘Hindu kiralongraba’ ta jembia mali, ta shiogo.
Shinde-i Parliament kima jembidang Rajnath-i ashiba ama Hindu kiralongraba ta jembia mali, ta Chidambaram-i ashi.
“Pai (Shinde) jembibaji right wing extremist teloktem aser parnok rongnung karbo bomb pokdaktsüba ken o aika nung tai tonglokja aliba- Malegaon aser Mecca Masjid densema tanga ken o ka-ana lir,” ta pai ashi.
“Tai tonglokja alir aika RSS den tesentaktep lir. Atangji nung, karbo RSS züngsem densma lir,” ta Chidambaram-isa shisem.
“Ajisüaka pai kiralongrabaji Hindu kiralrongraba ta mejembi ama ni bilemer. Iba orenji Rajnath Singh-i khenyongi melenshi jembi ama ni bilemer,” ta paisa ashi.