Hindu linük akümtsü atema Mohan Bhagwat-i Tir inyaktsüla: Shiv Sena

Mumbai, May 7 (Agencies): “Taruba linük Tir inyaktsü atema RSS tanishir Mohan Bhagwat shimra, India ya Hindu linük ka akümtsü,” ta Deobarnü Shiv Sena tanishir Uddhav Thackeray-i ashi.
“Tang mezüng atema, onok ((BJP-i aniba NDA)-i yimtenren tsütsü tashi tulu nguogo. Tongtipang alizüngji Hindu Rashtra akümtsü atema lir, anungji Bhagwat-i presidential election nung tokteptsüla” ta Aurangabad nung osangbener den sensaksemdang Uddhav-i ashi.
Shiv Sena ya Maharashtra nung aser Centre nunga BJP den teyariteper ka lir aser parnoki tir election nung National Democratic Alliance indang candidate atema Bhagwat tenüng benoka liasü. Ajisüaka, Rashtriya Swayamsevak Sangh tanishir Bhagwat-i tir election nung tokteptsü atema tejangraba kecha mali ta metetdakja lir.
Shiv Sena indang osangkaket ‘Saamna’ nung Uddhav-i ashiba agi, Hindu Rashtra mapa küma inyaktsü atema nübo tajungtibaji Bhagwat lir.
“Mapang talangka lir külen, party kati Centre nung tashi angu. Shibaibo linük asoshi tashitait tir tajung ka maginütsü? Iba jagi onoki tir election atema Mohan Bhagwat indang tenüng shidangogo” ta tanü Uddhav Thackeray-isa shisem.
‘Hindu Rashtra’ mapa küma inyaktsü atema Bhagwat temsüa lir asü ta osangbenertemi asüngdangdang, Uddhav-i “Kodaser metemsütsü? Tangalenbo RSS candidate tem tongti menden atema shimer, süra kechiba pa India Tir atema meshitsü?” ta langzü.
Taoba mapang Shiv Sena osangkaket nungsa RSS Headquarters ji tashi menden tanabuba lir ta metetdaktsüogo.