Hindu Mahasabha teloki LK Advani anema ken o benoktsü

Meerut, February 04 (Agencies): Ayodhya nung Muslim nunger tekülem ki Babri Mosque raksatsür joko küm 23 shi aoba mapang ka nung tanü sangdong ka ajanga Akhil Bhartiya Mahasabha-i, parnoki BJP lenir tain aser taoba mapang Deputy Ato kilonser, LK Advani anema ken o benoktsü, ta metetdaktsüogo.

Mahasabha lenir kati, Babri Mosque nung Ram Lalla (Baby Ram) indang süngyanglu ka liasü, aji raksatsübaji ‘Hindu tekülem ki ka aser Muslim tekülem ki ka’ raksatsüba den kasa züngshir, ta ashi.

Mahasabha telokisa, Babri Mosque raksatsüba mapang Ayodhya nung alir BJP lenir ana- Murli Manohar Joshi aser Uma Bharti na densema Ayodha nung alir ajak anema-a ken o benoktsü, ta shiogo.

Mahasabha-isa, ken o jembiba nung Muslim nunger adianutem medenibo Ram tekülemi ki mayanglutettsü ta ashiba den külemi Babri Mosque yanglutsü atema-a ali jurila ka agütsütsüla, ta ashi.

“Iba Mosque telung nung aliba tesem ka Ram Lalla-i moatsüogo ta amanger. Ajisüaka BJP lenirtemi ibaji raksatsü atema lokti ajungshi, Muslim nunger sarasademba tesemji yangji mali. Ajisüaka parnoki ajakji raksatsü. Iba tetezü, parnoki Hindu tekülem ki aser Muslim tekülem ki naprong raksatsüogo. Iba atema parnok nem temerenshi agütsütsüla,” ta Akhil Bhartiya Hindu Mahasabha Tir, Swami Chakrapani-i ashi.

Paisa, “Iba ken o nung tongti tasüngdangbaji L K Advani dang akatsü, iba tesem nung alir senior lenirji pa liasü. Loktii tekülem ki raksatsüba mapang pai repranga ata,” ta ashi.

You must be logged in to post a comment Login