Hindu-Muslim lungjemer sensak tia anema raratsüla: PM Modi

New Delhi, October 08 (Agencies): Tawa Dadri nung nashi shi achi ta tai tonglokja nisung ka tepsetba dak sentakba nung tanü Ato kilonser Narendra Modi-i ola adoka pai linük nüburtem dang tamangba yimsü tsüngda raratepba anema lungjemer raratsüla, ta ayongzükogo.

Bihar assembly election atongtsü ana nung lia Nawada nung sentong ka nung Modi-i, senso shia Tir Pranab Mukherkjee-i India nunger sobaliba temeyoptep ajak akhümtsübutepa alitsü jembiba ama alitsüla, ta ashi.

Anogo ka tejaklen Tir Pranab Mukherjee-i, India nunger taküm alitsü asoshi aremzüktepa aser akhümtsüputepa alitsü nüngdak ta shia liasü.

Tawa Muslim nunger kati nashi shi achi ta tai tonglokja loktii tepsetba onük nung Ato kilonser Modi-i ola madokba atema yimtenren lenir aikati pa aija liasü.

Tanü Ato kilonseri, linük telungjem nung alitsüla ta ashi.

“Sensak tia anema Hindu aser Muslim lungjemer raratsüla. India ya lungjema alitsüla. Tamangba yimsü ajak adianu ama yimjung nung aliba ajanga dang linük tejakleni aotsü,” ta Ato kilonseri ashi.

“Yashi Tir Pranab Mukherjee-i jembiba onük angadangang. Iba dakji alaka tuluba kecha mali. Tir-i asenok dang lenmang sayuogo, aser asenoki iba lenmang nungji jajatsüla. Ibaji ajanga dang alimai imlaba ama asenoki inyaktettsü,” ta Modi-i ashi.

Yashi Pranab Mukherjee-i, India nunger civilization ji amalitepba aser yimya tajungtem benshiba ajanga renlok, ta ashi.

Dadri tatalokba nungi yimtenren nung tajangzük bushiteptsü meranger ta shia Mukherjee-i, “Ni nüburtem ya ya shiner, yimtenren nung tajangzük angutsü atema nisungtemi sangdong mashie agütsür. Itemji süoki ia magitsü ni nüburtem dang mepishir,” ta jembia liasü.