Hindu-Muslim raradaktsütsüji BJP sentong lir: Rahul

Mandya (Karnataka), October 09 (Agencies): Dadri nung loktii Muslim nunger ka tepsetba dak sentakba nung yashi Ato kilonser Narendra Modi-i jembiba o aija tanü Congress tatong Tir Rahul Gandhi-i, Modi aser BJP-i linük nung telemsa adokdaktsür aser Hindu o Muslim nunger raratsüsa sentong atonger, ta ashi.

Yashi Modi-i, linük lungjema alitsüla aser linük nung tamangba yimsü ajak tsüngda adianu temeimtep alitsüla ta ayongzükba dak sentakba nung Rahul-i, “Ato kilonseri item ama o jembibaji kanga junger. Ajisüaka Ato kilonser indang puti otsü ka lir (Gujarat rara) aser party (BJP)-i khenyongi balaka inyaker, aser ibaji pai manendaktsüner ama reprangteter,” ta ashi.

Karnataka, Mandya district nung soseta asür aluyimer kibongtem ajuruba sülen osangbenertem den jembidang Rahul-i, “Iba linük nung telemsa adokdaktsütsü asoshi BJP aser Ato kilonser sentong ka lir. Hindu aser Muslim nunger na tsüngda rara adokdaktsütsü atema parnok sentong lir,” ta ashi.

“Election ajak nung nenoki angur. Telemsa adokdaktsüba lir. Rara adoker. Dadri nung atalokba nunga BJP nisungtem densema lir,” ta paisa ashi.

Tawa Dadri nung nashi shi achi ta tai tonglokba Muslim nunger ka tepsetba dak sentakba nung Ato kilonseri mapang talangka ola madoki lir yashi pai Bihar nung election nüboyim sentong ka nung iba tatalokba dak sentakba nung jembia liasü.

Yashi Modi-i, “Hindu aser Muslim-i parnok tsüngda raratsü asü, lungjemer sensak tia anema raratsü,” ta asüngdangba den külemi yimtenren lenirtemi nüngdak maliba sangdong agütsübaji nüburtemi süoki ia magitsüla, ta ta shia liasü.