Hindu nunger ajak ka küma longjemtsüla: Bhagwat

Meerut (Uttar Pradesh), Tsüklai 26 (Agencies): RSS tanishir Mohan Bhagwat-i, India-i dang alima dang lenmang shidak sayutettsü, anungji Hindu nunger ajak ka küma longjemtsü nüngdak, ta metetdaktsü.
Amongnü Uttar Pradesh nung ‘Rashtroday Sammelan’ sentong nung jembidang RSS tongti lenir, Bhagwat-i, linük atema ajak longjemtsüla; India telongjem anema asalentongtem liasü aser tarutsü nunga alitsü, ajisüaka asenok ajak ka küma longjemtsüla, ta ashi.
Uttar Pradesh anüolen nungi Union minister tem- Mahesh Sharma, Gen VK Singh, Satyapal Singh, aser state minister tem- Chetan Chauhan aser Dharam Singh Saini nungera iba sentong nungji dena liasü.
“Hindu nunger ajak ka dang, ta ajaki nümadanga shitettsüla. Hindu nunger longjemtsüla, ibaji asen teinyaktsü mapa. Asenok longjemra asenoki tetsükdaktsü aika koktettsü,” ta Bhagwat-i ashi.
“Asenok longjema melira alimai iba nungjagi maongka agitsü,” ta paisa shisem.
RSS nung inyakertem tenüngsanga pai, RSS züngsem 1,70,000 dak temai lokti tenzükba mapa balala inyaker aser linük tenzükba nung taküm tenla agütsütsü atema parnoki mulunga lir, ta ashi.
Tsüklai 11, 2018 nü Bihar sentong ka nung jembidang RSS tongti, Bhagwat-i, “Sangh-i anogo asemnü tsüngda sepaitem renemtettsü, ajisüaka Army temibo iba atemaji ita 6-7 agitsü. Asenok dak iba tashiji lir,” ta jembiba o ashishitepa mangatettep adoka liasü.