Hindu nunger medendangtsüla: Giriraj

Kolkata, January 31 (Agencies): Ayodhya nung Ram tekülem ki yanglutsü onük dak sendakba nung tanü Union Minister aser BJP lenir, Giriraj Singh-i, Hindu nunger medendangtsüla, ta ashi.
Paisa, Ram tekülem ki yanglutsü anema nokdakertemji Pakistan-i aotsüla aser yangji aliba democracy ji temdangtsüla, ta ashi. Singh-i, linük nung mezüng Ato kilonserji Sardar Vallabhbhai Patel asübo Ram Mandir onük ya yakta yongi benteter lila, kechiyong linük nung mezüng Ato kilonser, Jawaharlal Nehru-i vote bank atema metetsümonga iba ken o ya mebentet, ta ashi.
Minister-isa, Ram tekülem ki ya BJP atema yimtenren onük ka masü saka linük nung aliba Hindu nunger ajak asoshi onük ka lir, ta ashi.
Centre nung BJP-i aniba sorkar aitsürtem aija Singh-i, linük nung taremzüktep mali, ta ayimtenertemji “taremzükba malirtem telok” lir, aser parnoki linük tenüng menüktsütsü meranger, ta ashi.
Interview ka nung jembidang pai, “Asenoki (Hindu) aremzükba ajanga tanga tamangba yimsü amangertemi maongka agir. Hindu nütsüng timba aliba India ama linük ka nung asen tsüngrem dang sarasademtsü kechiba nokdanger. Asenoki asen tsüngrem dang sarasademtsü nokdangtsü atema tangar dak kechi temeden ali? Ajak nung taliji majung, iba ya ajanga Hindu nungeri maremzüktettsüa akok. Shingaia Hindu nunger medendangtsüla,” ta ashi.