Hindu nungeria nashi shi achir: Lalu Prasad

Patna (Bihar), October 03 (Agencies): Tawa Dadri nung nashi shi achi ta tai tonglokja tebur ka tepsetba dak sentakba nung Honibar nü Bihar yimtiba, Patna nung Rashtriya Janata Dal (RJD) tongti lennir Lalu Prasad-i, nashi shi achiba atema nisung tepsetbaji tai, ta jembiba den külemi Hindu nungeria nashi shi achir, ta jembiba ajanga mangatettep tasen ka adokogo.

“Dadri (Uttar Pradesh) nung nashi shi achiba atema tebur ka tepsetbaji tai. Pei chinüba chiyungtsü achitsü atema nisung ajak dak temeten lir,” ta Lalu-i Patna nung osangbenertem dang ashi.

“Dadri nung atalokbaji tamangba lokti dak sentakba lir. Iba tatalokbaji BJP ajanga lir,” ta taoba mapang Bihar chief minister Lalu-i ashi.

Hindu nungeribo shi machir asü (?), ta paisa asüngdang.

“Bendang linük nung alirtem mesüra bendanglen semdangertemi nashi shi achir, linük nunga Hindu nunger karibo nashi shi achir,” ta paisa ashi.

“Shi achirtem asoshi nashi shi aser napong shi na tebendangji kechi (?),” ta Lalu-i jembiba sülen senior BJP lenir aser Union minister Griraj Singh-i Lalu dang iba oji pai meyipa agitsüla, ta shiogo.

Singh-isa, Lalu-i pai jembiba oji meyipa magira taruba Bihar election nüboyim nung BJP-i iba onük süoka jembitsü, ta amokmerenogo.