Hindu Sena-i Aamir Khan’er kima lungkak ait

New Delhi, November 24, 2015 : New Delhi nung 8buba Ramnath Goenka Excellence in Journalism Awards sentong akadang Actor Aamir Khan-i National Conference nung tekolakba, Farooq Abdullah den salemba noksa nung angur.

Mumbai, November 24, 2015: Bollywood actor Aamir Khan-i ‘Intolerance’ dak sentakba nung o kar jembiba magizüktetba ajanga Hindu Sena activist temi Mongulbarnü par kima lungkak aita liasü.

Hindu Sena activist temi “Aamir Khan murdabad”, “Aamir Khan chale jao”, ta yimyim ayima Bandra nung aliba Aamir Khani’er ki telungi nungpoka aitsü merang, ajisüaka police temi nokdang.

Iba dak sendakba nung Hindu Sena züngsem 12 shi Bandra police station-i anir ao.

Lendong tali tuluba mekümdaktsütsü asoshi police peria yoka lir, ta ketdangser kati ashi.

Maharashtra Chief Minister Devendra Fadnavis-i Solapur semdangba mapang Aamir Khan-i jembia o atema kecha mesüok.

“Iba ama o den mapang enotoka raratsü melena nüngdakba mapang inyaker meinyakma lir. Item o jembitsü melena state nung tang rongdak tebilemtsü aika lir,” ta Fadnavis-i osangbenertem dang ashi.

Pune nung state Environment Minister Ramdas Kadam-i, “Aamir Khan-i jembiba oji sorkar mezüngshi-i, ozüng alema jembiba o lir anungji pa India nung alitsü sensena bilemra Pakistan-i aotsü kecha nokdanga mali,” ta ashi.

“India nung onoki nenok nem temeim peria agütsür—-Aamir Khan, Shah Rukh Khan aser Salman Khan.

Onoki nenok tamangba masü saka nenok dak aliba sempet repranger, süra yamaji inyakbaji per nem mamatsü jemdaktsü amai ang aküm asü ?” ta Kadam-i asüngdang.

Jammu & Kashmir nung telupur den kahtepdang asüsang Col. Santosh Mahadik’er kibong den Satara nung asüku lemsatepba mapang Nationalist Congress Party president Sharad Pawar-ia, Aamir Khan-i jembia o dak sentakba nung kecha mejembisem.