Hindu tem luja mejembitsüla

Islamabad, April 17 (Agencies) : Pakistan nung nija TV channel ka ajanga lokti tilaba, Hindu amangertem, kanga luja aser mezüngmeshia jembishinüba ajanga linük nung commentator kati iba ama tim masü mapa meinyaktsükla aser o mejembitsüla ta shiogo.
Pakistan osangkaket, The Nation nung shia aliba agi, nija TV sentong nung item o jembia shilem agisang ajanga nüburtem kanga pelatepdaktsü. Pai Hindu nunger dang ‘azü’ ta tenüng agüja jembi meso.
“Iba sentong ya koda sür TV nung sayu ta nibo kanga süngmanger, kechiba süra Pakistan linük nung Hindu amanger nisung million aika lir,” ta iba commentator yagi ashi.
“Tia kar maka Hindu amanger ya kaket, olemtep sentong aser nüburtem ajaki kanga tajemzük jenjang nung amshir. Balakata ano tang atalokba ya mesüka asaya menü atemer karibo Hindu amangertem kanga lutsüluponger,” ta pai ashi.
Donald Trump-i Muslim amanger anema jembiba mapang Pakistan rangben kanga nüngnüngtep.
“US nung mener jembiba o ajanga asenok yangi kanga mepelatep, süra asen linük nung asen nüburtem anema jembibaji khen kanga junga bilemdangtsü nüngdaker. Pakistan nung aliba Hindu amangertemji Muslim nunger marudang nungi linük nung küm meyirjang aika tejaklen nungi alirtem lir. Aikati iba otsüji memetet alitsü, ajisüaka ‘Islamic Republic of Pakistan’ litsü tesadang kabo Hindu yimsü poktetba tesem lir.” ta paisa ashi.
Pai, “Tamangba yimsü balala süaka linük ka nung aliba adianutem anema jembibaji kanga dang akhüm metetsübuba mapa lir,” ta shisem.