Hindu yimsü sayuba mapang

BJP telokibo manganütsüa akok saka linük nung BJP teloki yimsüsü tenzüker Hindu yimsü dak aketba tamangba yimsü renloktsü aser ajungkettsü asoshi inyakba mapa aika angutsü. Item rongnung kaji linük tesem kar nung nashi metepsettsü, nashi shi mayoktsü aser machitsü ozüng latetba ya ka asütsü. Iba denji ano kaketrejutem nung azüngba kakettem nung Hindu nunger chubatem otsü aser Hindu tesayubatem enoka yanglushir tanurtem nem züngdaktsütsü asoshi merangba mapatem asütsü. Item ajakji mapang tatsüka tsüngda nung inyaka otettsüba mapatem lir, kechiyong itemji yimten ait nung alirtem temulungtetba lir. Tang ya center nung BJP government liaka, parnoki bilemba ajak meinyaktetbaji Lok sabha nung parnoksa teimbaka süaka tuagi Rajya sabha nung parnok ishinba, iba jagi parnoki bilemba ama telemtetba magitetter. Ajisüaka, tanem- tanemi Rajya sabha nunga BJP pu semer teimba asütsüsa parnoki election agitsü anendaka aliba state-tem nung kanga temulung agüja inyaker. Aji oda, BJP teloki state election nung temulung agüja inyakbaji state nung government akümtsüba dang nungibo state nung jagi Rajya sabha atema tatar shimer yoktsübajiang tongtibangba lir. Iba nükjidongji kodang tongdir linük nung BJP teloki bilemba ajak inyaktettsü. Atangji, India nung ya senso shia pei amangnüba  tamangba yimsü amangtsü, sayutsü aser benshitsü akok. Ibayongji, taoba hopta nung India ato kilonser, Narendra Modii US nung oagi jembidang India nung temeshi kaketji linük temzüng dang lir ta metetdaktsü. Tetezü, India nung tamangba yimsü kechaia yimsü masür. Linük temzüng nung lateta akaba apibo aji shitak lir. Ajisüaka, Hindu yimsü amanger kari tesem  kar nung Khrista yimsü anema tenla ki raksatsüra, arogo nungertem dak teka sangshira aser tenzükertem taküm samatsüra, ato kilonseri oagi America nung jembiba o aruagi linük nung atalokba na tsüngda talangka ittepa lir asütsü. Ano, tang Hindu yimsü dak aketba yimya ka indang jembibaji Yoga ya lir. Aji oda, linük nung BJP teloki government kümer alima kintem madak takok ngua inyakbaji yaküm 2015 küm nungi küm shia June 21 ya alima Yoga anogo asütsü United Nations nung telemtetba agidaktsüba ya asütsü. Atangji, Yoga nung benshiba yimya ajungajibo Hindu yimsü dak aketba masütsüa akok, saka tetenzükba aser tang Yoga sayur aser benshir mongintembo Hindu nungertem lir. Iba Yoga nung ya anü külemba yimya aser asen taküm shi jenjang ya yutsür bendanga agüja bilemdangba aser külemba yimyatem lir. Item dakji alakabo tetsüng teben arakzüa temang kulenkosüba aser tango talanglang atsüketli aser sadokli ta asübatemjibo temang anema alitsü asoshi inyakba exercise ka amai asenokia benshitsü akok. Aji oda, tang ama linük nung Hindu yimsü agi amokbangtsü merangdang, asenok asoshi tekümdangtsü kaji exercise agiba tenüng nung asenoki Yisu külemtsü melen Yoga aidang sarasademba agi küpdokdaktsüra, atangji asenokji Hindu nunger asütsü. Atangji, aikati Yoga nokdangtsü nüngdakba indang jembir saka asenoki asen lima nung Yoga kisüng nokdangba agi Khrista osang tajung tali prokshia moutettsü. Asenoki nokdaktsüba kaji yimteni nübortem kangtepa Yoga aiba nung shilem magidaktsütsüla. Ibaji pei mulungba südakjang. Iba ama lima ka nungang asenoki Yisu osang tajungjia sademsadema sangdongtettsü. Tanü putu ya tamangba yimsü sayutsüngiba, prokshiba aser amangdaktsüba nung toktepba putu ka lir. Aji oda, Muslim nungertemia Europe lima ajak par yimsü agi akoktsü merangba mapang lir. Joko, London nung Mayor-bo Muslim nunger shimtetba asenoki nguogo. Aji oda, India yaa Hindustan akümtsüba merangba mapang lir. Idangji, asenok Khristan-tem teinyaktsüjia Tsüngrem temeim mapa inyaka osang tajung sangdongtsübaji lir. Ajisüaka, tang amai asenok tamangba yimsübo sen aser alima yimsüsüba menden dang amai kümdaktsüra, asüng asenok tenla kidangbo kangki melen süngyanglu angutsü.