Hindustan agi Hindu Rashtra melentsü atema inyakdar: Azam Khan

Lucknow, October 07 (Agencies): Bodhbar nü Lucknow nung official sentong ka nung jembidang Uttar Pradesh minister Azam Khan-i BJP sorkar aija, Babri nungi Dadri melenba ama India nung temelenshi kuliserji alima lir, ta ashi.
Azam-i, “Küm 60 tashi Muslim nunger India nung liogo aser Islamic State nung madentsü atema melungtet. Ibaji India ya secular linük ka, ta parnoki amangba ajanga lir. Pakistan-i aotsü atema mapang kobika onok amokmerentsü (?),” ta ashi.
Tawa Dadri nung alir ka tenüng agi, Mohammed Akhlaq-i par kidang nashi shi rizünga ayu ta tai tonglokja loktii pa tepsetba sülen iba ken o nung Azam-i United Nations dangi shidi zülua iba ken o tiyongtsüi aitdaktsüner ta mepishia liasü.
Azam-isa, Hindutva force temi Hindustan ya Hindu Rashtra melenstü merangba anema Muslim nüburtem aramesor lungkak aittsü mapang tongogo, ta ashi.
Paisa, “Mi agi mi merepseper, ajisüaka India secularism anema inyakertem anemabo asenoki noktaktsüla,” ta ashi.
Ato kilonser Narendra Modi-i sen lakh ana jenjang tsüngsem asemba indanga Azam-i aija jembiogo.
Linük nung yimjung nung linertem kümzüka meyuteter saka bendang linüktem nung linük nung senotsü intoktsü lenmang bushir Ato kilonser kaji anemsü, ta Uttar Pradesh minister Azam Khan-isa ashi.