Hindustan ya Hindu nunger atema: PB Acharya

Guwahati, Nov. 22 (Agencies): Honibar nü Assam Angh, PB Acharya-i, “Hindustan ya Hindu nunger atema. Iba nungji kecha tai mali. Linük balala nungi Hindu nunger yagi arua litettsü. Parnokji bendanger masü. Iba nungji tetsübutsü kecha mali,” ta jembiba ajanga ashishitep aketba onük tasen ka adokogo.
Acharya-i jembiba o jangjashitsütsü atema Deobar nü ayongba osangbenertem senden nung pai, “iba oji state nung reshikangshi tia nung aliba Bangladesh nunger Bengali Hindu tem dak sentakba nung jembiba lir,” ta ashi.
Bangladesh nungi Hindu nunger meyipa arua alitsü onük ya Assam nung mangatettep onük ka lir aser Ato kilonseri Bangladesh nung aliba Hindu nunger yaküm Dec. 31 tashi nung Assam-i arua alirtembo alitsü temelaba agütsütsü lemtetba anema Asom Gana Parishad ama yimtenren teloki lungkak aiter.
“Nisung ka tamangba yimsü ajanga linük ka nung reshikangshidaktsür ta asenoki metettsüla. India nunger Khristan tem Pakistan nung kangshira parnoki India-i arutsü asü. Parnok kongi aotsü (?),” ta Angh-i asüngdang.
“India linük ya temulung tulu, Hindu nunger shilem 100 yangi lir. Persia, tangbo Iran, samatsüogo. Persia nunger yangji tembang. Parnok yangi azükarua ali. Tata ji shiba (?) Godrej ji shiba (?) Wadia ji shiba (?) Parnok ajak yangi azükarua alir. India-i parnok nem tejenokdak agütsü. Alima nung ajak agizüktetba linükji India lir,” ta Acharya-isa ashi.
India nung aliba Muslim nunger dak sendakba nung pai, “India nung aliba Muslim nunger koleni onüdir sadoka lir. Aika yangi alir. Aika Pakistan-i aoer. Parnoki Bangladesh mesüra Pak-i onür. Parnok yangji reshikangshira, yangi arung. Kari dang meyipa arur. Parnok arura onoki agizüktsü,” ta ashi.
Acharya-i jembiba onük ajanga yimtenren nung yipru tesashi aita Congress-i, sangküm election agitsü lia Assam nung telemsa adokdaktsütsü atema BJP-i Angh office amshir, ta aitsür.