Hitler pa sasa mekaset saka Brazil nung arishi küm 95 tonga lir asü

London, January 25 (Agencies): Alima nung lenir rongnung nisung tamajungtiba, Adolf Hitler ya bunker nung pa sasa kahseta asü ta asenok tamalen nungi angashia aru ajisüaka pa Brazil nung jenoker tetong den arishi küm 95 junga lir asü, ta osang ka ajanga metetdaktsüogo.

Adolf Hitler ya Argentina len nungi Paraguay-i jena ao aser iba sülen Brazil nung aliba Mato Grosso jila nung oa jenok, ta Simoni Renee Guerreiro Dias-i züluba “Hitler in Brazil – His Life & His Death” kaket nung shia lir ta skynews.com ajanga metetdaktsü.

Dias-i otsü züluba dang masü saka pai züluba den yariteptsü asoshi Hitler aser tetong Cutinga na külemi tangokba noksa-a ka amshia lir. Iba noksaji pa asütsü küm ana lia tangokba lir.

Hitler-i Brazil nung alidang pa tenüng Adolf Leipzig ta amshia liasü aser pa dang yangji alirtemi ‘Germany nunger tambusang’ ta sa ajaba, kasa osang ajanga ashi.

Dias-i, Hitler ya Vatican nung aliba par tembartemi agütsü map ka amshia iba ali nung rema aliba senti oset bushitsü asoshi iba tesemi aru, ta ashiba kasa osang ajangsa metetdaktsü.

Hitler ya April 30, 1945 nü pa sasa bunker nung kahset ta jembibaji tiyazü ta Dias-i aitsüogo. Lai Leipzig rema alibaji tuteter DNA tendangang, ta takhangba ka agütsüogo.

Dias-i Adolf Leipzig indang noksa ka nung photoshop amshia pangsemo enokja Nazi lenir, Hitler den medemdangba sülen temulung melemi bushisüngdangtsü tenzük, ta kasa sangdong ajanga ashi.

Mapang talangka Hitler ya South America nung oa jenok, ta Conspiracy theorists temi jembir aser Brazil nung Academics temi pa Brazil nung lia asü masü ta jembia arur.

You must be logged in to post a comment Login