HIV agi shirangertem tekaraba nung anepaluadoktsüla:WHO

United Nations, September 30 (Agencies): Alima ajunga nung AIDS tashidak poktetdaktsüba HIV mesen temang nung keta alirtem nem tekaraba mapang nung anti-retroviral taneptsü agüja anepaluadoktsü tajungshiba olen ka United Nations (UN) kübok tentetba World Health Organization (WHO)-i tanü Bodbar nü metetdaktsüogo.
“HIV mesen temang nung aliba osang bushitetba sülen item nisungtem nem tekaraba mapang nung Anti-Retroviral Treatment (ART) agütsüba ajanga HIV mesen aketba nisungtem arishia lidaktsüba den külemi, par temang tia junga aliba aser tangar nem iba HIV mesen memenaloktsüba kuli tawa laboratory nung bushitetogo,” ta WHO-i tanü metetdaktsü.
ART mapang shitak nung agütsüba ajanga alima ajunga nung pei temang nung HIV mesen aketba nisung million 37 shi-i taküm talangba aliba den külemi, parnok indang temang tiaa tajungba lidktsür ta par teloki ashi.
Ano, HIV mesen menazüktsüsa alirtem nema HIV mesen memenazükdaktsütsü asoshi nungdakba anepalu agütsütsü tajungshiba olen ka par teloki metetdaktsü.
“Alima ajunga nung AIDS tashidak ya tarutsü mapang, 2030 küm tashi nungbo meshimeshia samatsütsü nükjidong tulu yua lir. HIV mesen aketba nisungtemi pei temang nem tashidak tulu bener arutsüba mesen aketba meteta akümba aser iba amala nisungtem nem ART anepalutsüren mapang shitak nung agütsüba ajanga iba alizüngji asangsang nung ajangzüktettsü,” ta par teloki shisem.
Par telokisa ashiba agi, HIV mesen keta alir nisungtem mapang shitak nung anepaluadokba aser HIV mesen menatepa aobaren nokdangba ajanga HIV/AIDS tashidak agi shiranga alir nisung million 21 tashi taküm kümzüktettsü aser 2030 küm tashi nung iba tashidak ya meshimeshia samatsütettsü.