HIV & AIDS atema state consultation agi

October 16, 2018 nü de Oriental Grand, Kohima nung HIV & AIDS (Prevention and Control) Act, 2017 indang State Consultation sentong nung H&FW Principal Secretary, Himato Zhimomi-i o jembidang agiba noksa angur.

Dimapur, Mongputeni (October) 16 (TYO): October 16, 2018 nü de Oriental Grand, Kohima nung HIV & AIDS (Prevention and Control) Act, 2017 indang State Consultation sentong agi.
Iba sentong nungsa State Specific Rule asoshi tatembang telemtetba agitsü benok.
Sentong nung o jembidang H&FW Principal Secretary, Himato Zhimomi-i ashiba agi, “tanü Nagaland nung HIV +ve case 20,000 dak tema lir saka 7000 shi kati dang ART aser ARV drugs agir.”
“Sorkari metokmeperi kar inyaka lira nenoki onok dang shiang. NACO mesüra NSAC-i metongjemi inyaka lira, tanü ya mapang tajung lir anungji nenoki tebilemba lemsatepangma” ta Himato-isa ashi.
Nagaland nung HIV 90% dak temaji shi nung medemba ajanga menatepba lir aser tashidakji metetsümonga menara, anepalutsüla. Iba Workshop nung teinyaktsü kar lemsateptsü aser taruba küm 10 nung HIV maliba loktiliba ka akümtsü atema tebilembatem lemsateptsü, ta paisa metetdaktsü.
Himato-isa Network of Naga People living with HIV/AIDS pur dang teyari agitsü atema ayongzük.
Sentong nung Consultant (IEC & Mainstreaming), NACO, Garima Sharma-i HIV (Prevention & Control) Act, 2017 indang jembi.
Iba mapang Garima Sharma-i HIV jenjang, HIV aketertem atema ART aser tanga teyaritem agütsüba, Centre aser State sorkartemi mapa balala inyakba aser ketdangsertem shimba onüktem metetdaktsü.
Nagaland State Legal Services Authority, Member Secretary, Mezivolu T Therie-ia ashiba agi, Act tali angatettsü aser HIV & AIDS noktangtsü aser azüoktsü atema külemi inyaktsü aser meimchir temeten kümzüka ayutsü atema iba sentong ayongzüka agir.
NSLSA-i HIV/AIDS noktangba aser azüokba mapa nung akokba tashi yaritsü aser iba tashidak agi tonga alirtem temeten kümzüka ayutsü. Iba mapa nung yimtsüng, shisaliok rejutem, arogotem aser telok ajaki yariteptsüla, ta Mezivolu-isa ashi.
Iba workshop nung Project Director, NSACS, Dr. Ngangshimeren-i tesentepertem pela agizük aser NBCC, NMA, NSF, sorkar department tem, district administration aser tanga NGOs aden.
NSACS-i NACO, FHI360 aser KRIPA Foundation den yaritepa iba sentong ayonga agi.