HIV anema raratsü sabang tajungtibaji Arogo lir

Dimapur, May 24 (TYO) : Nagaland nung HIV tensa melenshidaktsütsü atema Arogo teyari nüngdaker ta Mokokchung nung Church Advocacy Programme nung o jembiri ashi.

May 24, 2016 nü Legislators Forum on AIDS (LFA), Nagaland-i teyari agüja aser Care & Support Society-i Pastor’s Fellowship Mokokchung Town nati yaritepa Artang Baptist arogo nung iba sentong ayongzüka agi.

Nagaland nung AIDS azüoktsü atema küm 20 tejaklen nungi NGO temi mapa inyaktsü tenzük, saka tanü tashi AIDS züiner. Iba mapa ya NGO temi dangbo makoktsü aser HIV anema raraji tangatetba shitak aliba senso ajak indang tebilemtsü khuret lir, ta shisalen sayur Ms. Hukatoli Chopy-i ashi.

HIV anema raratsü sabang tajungtibaji Arogo lir aser tanga sector ajak dang nungi Arogoi-i shilem tuluba awaloka oa inyakteter. NGO ji khen atema dang saka Arogo jibo teti atema lir aser Arogoi ashibaji ajaki angar, Arogoi tanela tsütsü tesayuba agütsütettsü aser Arogo ket nung sen lir. Anungji Arogoi HIV atema Camps aser sentong balala ayongzüka agitettsü, ta laisa ashi.

Iba sentong nung Arogo 13 nungi ketdangsertem aser Care & Support Society züngsemtem aden.