HIV/AIDS agi shiranger nisung 86 aneptsüogo: Ram Baruah

Guwahati, July 17 (Agencies): Guwahati nung temelungjang surgeon, Dhani Ram Baruah-i pai HIV/AIDS tashitak asoshi mozü ka ngutetogo aser tesüiba küm 7-8 nung nisung 86 bo aneptsüogo ta sangdongogo.
“Kü den ozü teloki tesüiba küm 18 tashi kanga meranga inyakogo aser Himalaya region nung anguba achitsü akokba aser mozü aketba süngolio nungi biological molecules ajanga HIV/AIDS aneptsü asoshi ngutetogo. Ni iba dangji Baruah Biological Combat Genes ta jatsüogo, iba ya HIV mesen tepsettsü asoshi biological missiles ama amshir aser immune system tajungba kümdaktsütsü asoshi amshir,” ta Baruah-i ashi.
Paisa HIV/AIDS agi shiranger nisung ka tenüng agi Bijendra Singh osangbenertem matsüngdangi anir oa kuli süogo.
Baruah-i ashiba agi, 2008 küm Singh dak HIV-positive putet, saka tangbo pa kanga junga anepogo aser tawa pa dak tendangba negative adok.
“Tesüiba küm 8 tsüngda ni HIV/AIDS agi shiranger nisung 86 aneptsür rongnung Singh ka lir,” ta Baruah-i ashi.
Iba tashitak aneptsütetba osang metetdakja pai UNAIDS, WHO aser National Institute of Health (US) dangi shidi züluogo. “HIV/AIDS agi shirangertem ni taneptsü ngudaktsüba takok otsüji ni shidi ajanga UNAIDS, WHO aser National Institute of Health of USA nem metetdaktsüogo aser parnok dang, ni nisung 86 taneptsü ngudaktsüba kü mapatem indang bushisüngdangang ta mepishiogo,” ta Baruah-i ashi.
Pai anepaluba HIV/AIDS ajanga shiranger nisung 86 nem treatment agütsüba sülen pai parnok dak aiben tetendangba agiogo, aser parnok ajak HIV-negative tendangtet.