Hizbul Commander Hammad Khan densema kiralongrar asem khaset

New Delhi, January 12 (Agencies): Amongnü Jammu & Kashmir nung Pulwama kübok Tral area nung security sepaitemi kiralongrar telok, Hizbul Mujahideen nung Commander, Hammad Khan densema kiralongrar asem khasetogo; ano kiralongrar kabo iba tesem nungji atsüka lir, ta osang angazüker.
Osang ka ajanga ashiba agi, 2017 küm Sabzar Ahmad Bhat asüba sülen Hammad-i pa melenzüka Hizbul Mujahideen commander shilem agir.
Arishi küm 27, Bhatt ya 2017 küm May ita nung security sepaitemi telungpur mita aodang Tral nung khaseta liasü. Pa asüba sülen taoba mapang state, Jammu & Kashmir kübok Anantnag, Budgam, Ganderbal aser Pulwama densema tesem aika nung rara adoka nisung jenti yirua liasü.
Ki ka nung kiralongrartem jenoka lir ta Intelligence osang ka angazükba nung ajemdaker tanep security sepaitemi south Kashmir nung Tral kübok Gulshanpora area longbanger telungprtem mita ao.
Police-i ashiba agi, sepaitemi telungpur mita aoba mapang nung ki ka nung jenoka aliba kiralongrartem jagi tama sepaitem dak injang khaloktsüba sülen parnok tsüngda khatep tenzüka liasü.
Yashi-a south Kashmir kübok Aanpoo Anantnag nung security sepaitemi Hizbul-Mujahideen telok den densema aliba kiralongrar asem pua liasü. Parnok ket nungi prangpong den injang aika apu.
Par asem rongnung kabo Hizbul Mujahideen telok nung tongti commander ka lir.
Kiralongrar asem denji police ketdangser- DSP Devinder Singh-a densema apu kechiyong kiralongrar asem denji külemi pa-a kasa gari nungji mena liasü, ta police-i metetdaktsü.